Bazar ertəsi , İyul 22 2019
Ana səhifə / Gündəm / Ailə TV, yoxsailə CityNet-in oyunu: Azərbaycan dövlətinə qarşı təxribat!

Ailə TV, yoxsailə CityNet-in oyunu: Azərbaycan dövlətinə qarşı təxribat!

Azər HƏSRƏT, [email protected]

CityNet adlı internet provayderinin xidmətlərindən istifadə edirəm. Ötən ilin fevralında başlamışam istifadəyə. Aylıq abunə haqqı 18 manat idi. Bura IP TV və internet daxildi.

Bu yaxınlarda, konkret olaraq avqustun 15-i axşam TV-nin zəif göstərdiyini görüb CityNet-in müştəri xidmətlərinə (537 77 77) zəng etdim. Cavab bu oldu ki, borcum varmış.

Necə yaranıb, hardandır?

İzah edə bilmədilər. Çünki balansda artıq pulum vardı, borc yarana bilməzdi. Amma az sonra izah etdilər ki, abunə haqları yüksəldilibmiş…

Əlavə izah istədim, dedilər ki, bu ilin mayından siz 24 manat ödəyirsiniz. Dedim ki, axı belə şey olanda adama xəbər verərlər. Xəbər vermişik dedilər. Kimə, necə? İddia etdilər ki, guya mənə SMS göndəriblər. A tövbə! Nə SMS almışam, nə də qiymət dəyişməsindən xəbərim var!

Bu sayğısızlığı görəndən sonra səhəri gün xidmət məntəqəsinə yaxınlaşıb bunlardan imtina üçün ərizə yazdım. Səbəbini də elə yuxarıda göstərdiyim kimi qeyd elədim.

Amma qoşulmaq istədiyim provayder vaxtında internet məsələsini həll edə bilmədiyi üçün məcbur qalıb CityNet-in internetini saxladım. TV-dənsə imtina etdim. Əvəzində Ailə TV-nin pleyerini qoşub kanallara baxmağa başladım. Düşünürdüm ki, bununla da problem həll olunar.

Olundumu? Təbii ki, yox!

Dünən, sentyabrın 8-də evə gələndə gördüm ki, Ailə TV göstərmir. Ekrana çıxan xəbərdə deyilirdi ki,“Serverlə əlaqə yoxdur. İnternet ilə bağlantını yoxlayın”. Yəni mənim provayderim – CityNet internet bağlantısında problem yaradır kimi gəldi mənə.

TV ekranında belə yazılır...

TV ekranında belə yazılır…

Zəng etdim. Daş atıb başlarını tutdular ki, problem onlara aid deyil. Dedim, axı açıq şəkildə ekranda yazılır ki, internet bağlantısı problemidir. Dedilər, başqa qurğular işləyirsə, deməli, internet bağlantısı problemi deyil. Problemin kökü Ailə TV-nin özündəymiş.

Bu dəfə Ailə TV-yə (920) zəng etdim. Dərhal soruşdular ki, hansı provayderdir. CityNet deyəndə telefonun o başındakı adam duruxdu, qayıtdı ki, müəllim, problem araşdırılır. Dedim, bilirəm ki, çirkin rəqabət üzündən baş verir bu. Qayıtdı ki, konkret bir söz deyə bilmərik, araşdırırıq.

Bir neçə saat sonra problem həll edildi və TV kanallarına baxma imkanımız oldu. Düşündük ki, məsələ birdəfəlik həll edilib. Amma yox, bunlar problemi həll edənə oxşamır axı.

Bu gün, sentyabrın 9-da təkrar eyni problem yaşanır. TV kanallarına baxa bilmirik. Ailə TV-yə də zəng etmişik. Problemin dünən həll olunduğunu, bu gün yenidən yarandığını deməkdən başqa bir söz əlavə etmədilər…

İndi isə keçirəm məsələnin tarixçəsinə. Ailə TV pleyeri müştərilərə təklif ediləndə məhz bu CityNet ona baxmağı əngəlləyirdi. İmkan vermirdi ki, istifadəçiləri Ailə TV-yə baxsın. Yəni zorla insanları məcbur etmək istəyirdilər ki, TV xidmətini də CityNet-dən alaq. Bu mübahisə və çirkin rəqabət bir müddət davam etdi və sonra həllini tapdı…

Lakin CityNet üzərindən Ailə TV-yə baxmağa başladığım cəmi bir ay deyil, başımıza gəlməyən qalmayıb. Ya bəzi kanallar kəsintili göstərir, ya da son iki gündə olduğu kimi, ümumiyyətlə, heç bir kanala baxa bilmirik. Səbəbsə internet bağlantısı problemidir. Yəni adı üstündə: CityNet problemin səbəbkarıdır.

Sual oluna bilər ki, CityNet niyə belə edir?

Çox sadə cavabı var bunun: yəni həm interneti, həm də TV-ni bizdən alın ki, keyfiyyət problemi olmasın!

Lap yadıma Bakİnternetin bir zamanlar bizi boğaza yığması düşdü. Telefon xətti üzərindən interneti başqa provayderdən almaq istəyən abunəçiləri sürüm-sürüm süründürürdü bu zay Bakİnternet! Çıxış yolu da təklif edirdilər: interneti bizdən alın, 2 saat içində gəlib qoşaq!

İndi bu CityNet də eyni təfəkkürlə hərəkət edənə oxşayır. Yalnız bir şeyi unudurlar ki, artıq ölkədə bu sahədə də alternativlərin sayı yetərincədir. Ən pis halda isə, ümumiyyətlə, TV xidməti üçün çanaq antena quraşdırıb problemi kökündən həll etmək imkanımız da yox deyil!

Bütün bunlar öz yerində. Məsələ ondadır ki, ölkədə sentyabrın 26-na nəzərdə tutulan referendumun təşviqat mərhələsidir. Təbii ki, vətəndaş-seçicilərin maarifləndirilməsi vacib məsələdir. Amma bu CityNet və bənzəri qurumlar mənim kimi siyasi fəal vətəndaşın TV kanallarını qaraltmaqla faktiki referenduma hazırlıq prosesini pozurlar!

İndi təsəvvür edin ki, nə qədər abunəçi mənim kimi əsəb içində TV-yə baxmaqdan, ölkədə olub-bitənlərdən xəbər tutmaqdan məhrum edilib! Kimin, nəyin hesabına? Təbii ki, hansısa dəllalların çirkin biznes maraqları üzündən!

Bu tiplər 3-5 manat qabaq düşmək üçün dövlətin maraqlarını belə ayaq altına atmaqdan çəkinmirlər! İndiki həssas bir məqamda belə bir davranış sərgiləməyin tək bir adı var: Azərbaycan dövlətinə qarşı təxribat!

Çox istərdim ki, Milli Təhlükəsizlik Xidməti bu olayı dərindən araşdırıb əsl mahiyyətini və səbəbkarlarını üzə çıxarsın. Bunlar indi belə davranmaqdan çəkinmirsə, sabah, Allah eləməmiş, ölkədə kimlərsə qarışıqlıq salmaq istəsə, onlara efir verməyəcəklərinə heç bir təminat yoxdur! Bu, bir dövlət təhlükəsizliyi məsələsidir və dərhal həllini tapmalıdır!

Sözardı: Yeri gəlmişkən, başqa internet bağlantısıyla yoxladım, Ailə TV göstərir. Deməli, problemi yaradan birmənalı şəkildə CityNet-dir!

Həmçinin oxuyun

Elton Məmmədova məxsus şirkətin separatçılarla əlaqələri araşdırılır

Sabiq nəqliyyat naziri Ziya Məmmədovun qardaşı, keçmiş deputat Elton Məmmədova məxsus şirkətin adı Ukraynada ciddi …

Bir cavab yazın