Cümə axşamı , Sentyabr 19 2019
Ana səhifə / Dünya / Siyavuş Novruzov YAP-ın namizədlər siyahısı ilə bağlı önəmli məqamları açıqladı

Siyavuş Novruzov YAP-ın namizədlər siyahısı ilə bağlı önəmli məqamları açıqladı

Siyavuş Novruzov: “Siyahı ilə bağlı işlər yekunlaşıb…”

Hakim partiyanın funksioneri Eldar Sabiroğlunun ittihamlarına da reaksiya verib

Hakimiyyətin məxfi seçki hazırlığı ilə bağlı ən müxtəlif versiyalar dolaşmaqdadır. Hətta iddialardan biri budur ki, hakim partiya ölkənin siyasi həyatının qaynarlaşmasından ehtiyatlandığı üçün siyahı müəmmasını aradan qaldırmır, YAP-ın seçki siyahısnı açıqamır. Digər iddialar da var və bu barədə YAP-ın icra katibinin müavini, deputat Siyavuş Novruzovla danışdıq. 
Telefona gec cavab verməsini iclasda olmasıyla izah etdikdən sonra ilk sualımıza cavab verdi:
– Siyavuş bəy, iclas YAP-ın seçki siyahısı ilə bağlı idi, yoxsa..?
– Səlahiyyətli nümayəndələrin təsdiqi, onların yerlərə göndərilməsi, vəsiqələrin alınması və s. kimi seçki ilə bağlı kifayət qədər iş var.
– Yəqin bilirsiniz ki, YAP-ın seçki siyahısı zəlzələ mövzusundan da aktualdır. Bəs, nə vaxt açıqlanacaq?
– İnşallah bu həftə ərzində açıqlanacaq.
– Artıq həftənin iş günləri başa çatır. Bu gün, ya sabah ola bilərmi?
– Gözlənilir. İşlər yekunlaşıb.
– İddialar var ki, YAP ölkənin ictimai-siyasi həyatında canlanmanın, aktivliyin yaranmaması üçün siyahını da maksimum gec açıqlamaq istəyir…  
– Elə bir şey yoxdur. Onsuz da qanunvericilikdə belədir ki, imza toplayandan sonra seçkilərə ən azı 50 gün qalmış DSK-ya digər sənədləri təqdim etmək olar. Yəni onsuz da DSK ayın 12-dən tez hər hansı sənədi qəbul etməyəcək. Əgər namizəd irəli sürülürsə, namizədin müdafiəsi üçün seçici imzaları toplanılır və müvafiq sənədlərlə birgə DSK-ya təqdim etmək üçün seçkilərə ən azı 30 gün, ən çoxu 50 gün qalmış təqdim olunmalıdır. Bu baxımdan kifayət qədər zaman var. Əvvəlcədən qeyd etmişik ki, bizim hər dairə üzrə 10 nəfər imza toplayan şəxsimiz müəyyən olunub, onlara treninq keçirilib. Bir gün, gün yarım ərzində bunlar imzaları toplayacaq və müvafiq sənədlərlə birlikdə hazır vəziyyətdə saxlayacaq. Sentyabrın 12-nə qədər onsuz da sənədləri DSK-yə təqdim etmək mümkün deyil. O baxımdan da vaxtında biz bütün prosedurları yerinə yetiririk.
– Bütün işlər başa çatıbsa, namizədlərin yekun siyahısının açıqlanmasına mane olan nədir?
– Bununla əlaqədar gərək partiyanın ali orqanının, İdarə Heyətinin toplantısı keçirilsin. Bununla əlaqədar İdarə Heyətinə qabaqcadan müraciət olunur və s… Yəni nə vaxt olacaqsa, biz ictimaiyyətə açıqlayacağıq və bütün siyahını YAP-ın saytında yerləşdirəcəyik.
– Bizim qəzetimizə bundan öncəki müsahibənizdə demişdiniz ki, İdarə Heyəti bu həftə toplanacaq. Ertələnmə nə ilə bağlıdır?
– İdarə Heyətinin bununla bağlı toplantısı bir dəfə olub. Ancaq bu, səlahiyyətli nümayəndələrin təyin olunması ilə əlaqədar idi. İdarə Heyətinin qərarı ilə biz 160 nəfər səlahiyyətli nümayəndə təyin etmişik və MSK bununla əlaqədar qərar verib, onları müvafiq lövhəciklərlə təmin edib.
– Səlahiyyətli nümayəndələr dairələr üzrə təyin edilib, yoxsa konkret namizədlər üçün..?
– Dairələr üzrə… Hər dairə üzrə 2 nəfər səlahiyyətli nümayəndə təyin etmişik. Bundan başqa Əli Əhmədov respublika üzrə səlahiyyətli nümayəndədir, mən isə maliyyə məsələləri ilə bağlı bütün respublika üzrə səlahiyyətli nümayəndəyəm.
– Tərəddüdlərinizdən belə çıxmırmı ki, hələ 125 nəfərlik siyahının tərtib olunması tam başa çatmayıb? 
– Yox, siyahı tam dəqiqləşib, amma xırda detallar qalır. Namizədlərlə bağlı məlumatlar olmalıdır. Bu məlumatlar həm bildirişdə, həm razılıq ərizəsində, həm də protokolda olmalıdr. Bu baxımdan texniki işlər gedir.
– Eldar Sabiroğlu açıqlamalarının birində YAP rəhbərliyindən narazılığını ifadə edib. Bu barədə nə deyə bilərsiniz?
– Onun dediklərini oxumamışam. Başım bu işlərə o qədər qarışır ki, oxumağa imkanım olmayıb.
– Eldar müəllim YAP üzvüdür, yoxsa Müdafiə Nazirliyinə gedəndən partiyadan uzaqlaşıb?
– Partiyanın üzvüdür. Hərbi sahəyə getdikdən sonra partiya fəaliyyəti dayandırılmısdı. Ordudan tərxis olunandan sonra yəqin ki, bərpa ediblər.
– O, deyir ki, “Partiyada və yuxarı dairələrdə məni arzulamayan insanlar var. Bunu gizlətməyimin bir mənası yoxdur. Onlar mövqe sahibidirlər”. Onu da etiraf edib ki, kimlərinsə adlarını çəkmək ona xeyir gətirməz, çünki üstünə şığıyarlar. Çox ciddi ittihamlardır…
– Bununla əlaqədar konkretlik lazımdır. İstəmirəm ki, ümumi sözlərə münasibət bildirim.
– Nəsimi rayonunun sabiq icra başçısı deyib ki, deputat olmaq istəyirmiş, ona görə də vəzifədən çıxarılmasını şəxsən xahiş edib…
– Deputat olmaq hər bir vətəndaşın arzusu, istəyidir. Yaşı 25-ə çatmış hər bir Azərbaycan vətəndaşı seçib-seçilə bilər. Bəzi məhdudiyyətlər var, ağır cinayət törədənlərə, əqli cəhətdən zəif olanlara qanunla məhdudiyyətlər qoyulur. Digər vətəndaşlara Konstitusiya ilə seçilmək hüququ verilib. Ona görə də, kim istəyirsə, buyurub, namizədliyini irəli sürə bilər.

Həmçinin oxuyun

Pasportun ilginc tarixi haqda maraqlı faktlar

Pasportun yaranma tarixi barədə çoxları məlumatsızdır. Beləliklə məlumata görə pasport haqqında ilkin məlumat Nehemyanın kitabında …

Bir cavab yazın