Dünən azərbaycanlı gəncin Fəvvarələr Meydanında sevdiyi qıza evlənmə təklif etməsi sosial şəbəkələrdə maraqla qarşılanıb. Təklifi edən Elşən Məmmədov bunun üçün “flash mob” hazırladıb və yaxınlarından kömək alıb. Yaşadığımız mühitdə bir çox insan qınaqdan çəkindiyi üçün bunu edə bilmədiyindən gəncin addımı yüksək qiymətləndirilib.
“Qafqazinfo” evlilik təklifini həyata keçirən Elşən Məmmədovun fikirlərini öyrənib. O bildirib ki, dünəndən xeyli müsbət reaksiya alıb, tanıyan, tanımayan hər kəs onu təbrik edir:
““Flash mob” üçün 15 gün məşq ediblər. Xanımın məlumatı yox idi, bu, ona sürpriz oldu. Monitorda saniyələr gedirdi və birdən “flash mob” başlandı. Daha sonra yaxınlarımız, dostlarımız əllərində gül və şarlarla gəldi. Ən əsas istədiyim Tofiq Quliyevin lirik sevgi valsı altında rəqs etmək idi. Ən azından köklü musiqilərimizi yaşatmalıyıq. Kömək edən hər kəsə, xüsusilə də, Hacıbala müəllimə təşəkkür edirəm”.