“Gərək vecsiz olasan, mən də bunu bacarmıram” – Müğənni

“İndi yaşayırıq, həyat şirindir. Amma ikinci dəfə bu həyata gəlmək istəmərəm. Dünyanın haqsızlıqlarına dözmürəm. Bu balaca çiyinlərimdə yükü daşıya bilmirəm, yorulmuşam. Allahıma dönə-dönə yalvarıram ki, məni bu dünyaya bir də gətirmə”. 

Bu sözləri müğənni Bahar Lətifqızı “Günün sədası” proqramında qonaq olarkən deyib.

Sənətçi həyatdan zövq almadığını bildirib:

“Dünya bir pəncərədir, hər gələn baxıb gedər”. Mən də gəldim, baxdıqlarımdan zövq almıram. Ancaq övladlarımdan zövq alıram. Bu dünyanı sevmirəm. Burada ayrılıqlar çoxdur. Uşaqlar ana-atalardan ayrılır. Buna dözmək çox çətindir. Gərək vecsiz olasan. Mən də bunu bacarmıram”. 

O, həmin açıqlamasını “Instagram” hesabında yazaraq bunları əlavə edib: “Həyatın hər üzünü görmüşəm. Yaşım çox olmasa da, hər çətinliyi yaşamışam. Aclıq, soyuqdan donmaq, ana-ata arzulamaq və s. Bu dünyada müəyyən insanlara etibar yoxdur. Allah dünyamızı qorusun”.

Daha sonra sözügedən posta izləyicilərdən biri “sizdən daha pis yaşayanlar var, qədrini bilin” şərhini bu cür cavablandırıb:

“Bircə bunu deyə bilərəm ki, 5 yaşımda gecələr anamın qoynunda yatmaq, isti evimizdə böyümək istəyirdim. Əvvəldən mənimki gətirməyib. Yəni həyatım bu cür başlayıb”.