“Petrol Ofisi bizim üçün ən uyğun seçimdir. Təbii ki, burada ortaya çıxacaq qiymətləndirmə də önəmlidir. Petrol Ofisini ala bilməsək bizim B və C planlarımız da var. Başqa bir şirkəti satın almaq üçün danışıqlara gedə, yaxud sıfırdan bir şirkət yarada bilərik”.
“Qafqazinfo” Türkiyə KİV-nə istinadən xəbər verir ki, bu sözləri SOCAR Turkey Energy-nin baş icraçı direktoru Zaur Qəhrəmanov deyib.
O, Türkiyədə lirənin, Azərbaycanda isə manatın dəyərdən düşdüyü bir vaxtda sərmayələrin durumu ilə bağlı sualı cavablandırıb. Qəhrəmanov bildirib ki, Türkiyəyə 4-5 il kimi qısa vədəli deyil, 40-50 il kimi uzun vədəli baxırlar, gündəlik iqtisadi böhranlar onlara təsir etmir, sərmayə qoyuluşlarına isə davam edəcəklər.
Qeyd edək ki, “Petrol Ofisi” Avstriyanın neft-qaz konserni olan “OVM” şirkətinin Türkiyədəki törəməsidir.