Uzun müddət media və PR sahəsində çalışan İlham Məmmədzadə aldığı yeni iş təkliflərini dəyərləndirir.
Bu barədə Moden.az-a danışan İ.Məmmədzadə təkliflərin dövlət və özəl sektordan olduğunu deyib:
“Hazırda dincəlirəm. Bir neçə təklif var, onları dəyərləndirirəm. Dövlət və ya özəl sektor olaraq düşünürəm. Təbii ki, yeni işim PR-la bağlı olacaq. Bəzən bizim qurumlar iş təklifində PR nəzərdə tutur, amma tələb etdikləri yalnız mətbuat katibi funksiyalarıdır. Düşünürəm bir şirkətin ictimaiyyətə tanıdılması və sevdirilməsi istiqamətində bir PR mütəxəssisi olaraq bacardıqlarımı etdim. Məncə bu, məndə alındı”.
Hər zaman jurnalistlərlə dost münasibətində çalışmağa üstünlük verən İ.Məmmədzadə yenidən onlarla birlikdə olacağını vurğulayıb.
İlham
Məmmədzadə 2007-2008-ci illərdə “Yeni İqtisadiyyat” jurnalında
informasiya şöbəsinin müdiri və “Ekspert” jurnalinda analitik kimi
çalışıb. 2000-2010 illər ərzində “Azadinform” İnformasiya Agentliyinin
İqtisadiyyat şöbəsinin müdiri kimi fəaliyyətini davam etdirib.
2010-2011-ci illər ərzində Əmək və Əhalinin Sosial Müdafiəsi
Nazirliyinin Ümumi şöbəsində məsləhətçi, 2011-2012-ci illər ərzində Əmək
və Əhalinin Sosial Müdafiəsi Nazirliyinin İctimaiyyətlə əlaqələr
şöbəsində müdir müavini və ictimaiyyətlə əlaqələr sektorunun müdiri
vəzifəsində fəaliyyət göstərib.
2012-ci ildən 2014-cü il yanvarın
14-dək Əmək və Əhalinin Sosial Müdafiəsi Nazirliyinin İctimaiyyətlə
əlaqələr şöbəsinin müdiri vəzifəsində çalışıb. 2014-cü ildən 2019-cu
ilədək isə “Veysəloğlu” Şirkətlər Qrupunun İctimaiyyətlə əlaqələr
şöbəsinin müdiri vəzifəsini tutub.