Bazar ertəsi , Avqust 19 2019
Ana səhifə / Köşə Yazarları / “Azərbaycan” Nəşriyyatından qəzetlərə zərbə: Redaktorlar qiymət artımından narazıdırlar 

“Azərbaycan” Nəşriyyatından qəzetlərə zərbə: Redaktorlar qiymət artımından narazıdırlar 

“Azərbaycan” Nəşriyyatı manatın devalvasiyasından sonra ölkəyə gətirilən poliqrafiya məhsullarının qiymətinin kəskin artması səbəbindən çap xərclərini artırıb. 
Bu gün nəşriyyat çap etdiyi qəzetlərin redaksiyalarına məktub yollayaraq, qiymətləri birdən-birə 25 faiz artırdığını elan edib.
“Yeni Müsavat” qəzetinin baş direktoru Ələsgər Süleymanov “Azərbaycan” Nəşriyyatının bu qərarı ilə bağlı açıqlama verərək, bildirib ki, qərar məyusluqla qarşılanıb.
Onun sözlərinə görə, qəzetlər çap qiymətlərinin artmayacağına ümid edirdilər: “Hökumətin anonsları ümid verirdi ki, çap xərcləri artırılmayacaq. Təəssüf ki, buna gedildi və “Azərbaycan” Nəşriyyatı qiymətləri artırmaq məcburiyyətində qaldı”.
Ələsgər Süleymanovun fikrincə, bu, vəziyyəti onsuz da ağır olan çap mediasının sonu anlamına gəlir: “Onsuz da qəzetlər çap xərclərini vaxtında və tam şəkildə ödəyə bilmirdilər, nəşriyyata borc yaranırdı. Qiymət artımından sonra yığılan borcların həcmi daha da artacaq. Təbii ki, bu, sonsuzluğa qədər bu cür davam edə bilməz. Borcları artan qəzetlər fəaliyyətlərini dayandırmaq məcburiyyətində qalacaqlar”.
“Yeni Müsavat”ın baş direktoru hökumətin məsələyə müdaxilə edəcəyinə və qəzetlərin maliyyə problemləri üzündən məhvinə yol verilməyəcəyinə ümid etdiyini də bildirdi.
“Azadlıq” qəzetinin redaktoru Sücəddin Şərif bildirdi ki, bu qərardan sonra da qəzetlərin vəziyyətinin ağırlaşacağını nəzərə alaraq, hökumətə təkliflər göndərəcəklər: “Bizə də o məktub daxil olub. Rəsmi xəbərdarlıqdan əvvəl şifahi xəbərdarlıq da edilmişdi. Ona görə də, biz məcburiyyət qarşısında qalıb, 10 qəpik artıma getdik. Hər halda bu da artırılan 25 faizi təmin etmir. Hər halda biz bu artıma getməyə məcbur idik. İndi sonrakı addımlarımız da hadisələrin gedişindən asılı olacaq. Zərurət olsa, qiymətlərə yenidən baxacağıq. Həmçinin səhifələrin sayının azaldılması, qiymətlərin artırılması, ixtisarların edilməsi də istisna deyil. Bundan əlavə biz qarşıdakı günlərdə mətbuat vasitəsilə hökumətin müəyyən dairələrinə öz təkliflərimizi də göndərəcəyik. Yəni hökumət reklam bazarı və kağızların daşınma xərcləri ilə bağlı düşünməlidir. Bu məsələdə, eləcə də sadələşdirilmiş vergi məsələsində güzəştlər etmək, mətbuata ayrıca baxmaq olar. KİVDF birbaşa nəşriyyatlara kağız üçün yardım göstərə bilər. Müəyyən tədbirlər görülsə, qəzetləri bu ağır vəziyyətdən çıxartmaq olar”.
“Bakı xəbər” qəzetinin baş redaktoru Aydın Quliyev bildirdi ki, nəşriyyatın çap xərclərini artırması vəziyyəti daha da ağırlaşdırır: “Bu, artıq ikinci dəfədir ki, çap xərcləri artırılır. Birinci devalvasiyadan sonra da 32 faiz qiymət artımı olmuşdu. O zaman da qəzetlərin etirazları hər hansı rol oynamadı. İndi də heç bir rol oynamayacaq. Ona görə də, məcburuq ki, bu qərarla razılaşaq. İmkanımız olsa, fəaliyyətimizi davam etdirəcəyik, imkanımız çatmasa, başqa variantlar düşünəcəyik. Böhran olduğu üçün jurnalistlərin əmək haqlarının artırılmasına da ehtiyac var. Həqiqətən də çap xərclərinin qaldırılması bizim vəziyyətimizi ikiqat ağırlaşdırır”.
“Gündəlik Teleqraf” qəzetinin baş redaktoru Aynur Camal da bildirdi ki, bu, arzuolunan deyildi: “Mən də qəzetin çap işi ilə məşğul olan şəxslərlə bu informasiyanı dəqiqləşdirəcəyəm. Bizim işlədiyimiz nəşriyyat hələ ki, mənimlə bu haqda heç nə danışmayıb. Vəziyyətin gedişatından belə görünür ki, ölkədə hər sahədə qiymətlər artacaqsa, nəşriyyatın da qiymətləri artırması normaldır. Sadəcə olaraq, mən düşünürəm ki, Azərbaycanda fəaliyyət göstərən nəşriyyatlar nəzərə almalıdırlar ki, biz çap mediasından gəlir götürə bilmirik. Qəzetdən gələn gəlir bizim işçilərimizin maaşına, qəzetin çap xərclərini ödəməyə güclə çatırdı. Əgər biz qəzet satışından gəlir əldə edə bilmiriksə, qəzetin qiymətini artırmırıqsa, o zaman təbii ki, nəşriyyat qiymətləri qaldırsa, biz bundan əziyyət çəkəcəyik. Mən düşünürəm ki, qəzet redaktorlarının toplaşıb, bu məsələni müzakirə etməsinə ehtiyac var”.
“525-ci qəzet”ın baş redaktoru Rəşad Məcid isə bu qərarın gözlənilən olduğunu bildirdi: “Biz gözləyirdik ki, nəşriyyat qiymətləri artıracaq. Bizə də bu barədə bildiriş daxil oldu ki, çap xərcləri 25 faiz artırılıb. Hər halda düşünürük, bir çıxış yolu tapmağa çalışırıq. Ancaq qəzetin qiymətini artırmayacağıq”.  Musavat.com

Həmçinin oxuyun

Avropalaşan Naxçıvan- Ədib İSAQOĞLU

Bir nəfər müsavatçı tanışımın Naxçıvan haqqında məlumatsızlığı, məni bu yazını yazmağa vadar etdi. Tanışımın mənə …

Bir cavab yazın