Mərkəzi Bank yarım milyona kompüterlər alır

Azərbaycan Mərkəzi Bankı tərəfindən keçirilən tender müsabiqəsinin qalibi məlum olub.
Tender müsabiqəsinin qalibi olan “ATA Texnologiya” MMC (VÖEN – 1400211841) Mərkəzi Banka  kompüter, printer, şəbəkə və ofis avadanlıqları satacaq.
Mərkəzi Bank alacağı avadanlıqlar üçün “ATA Texnologiya” MMC -yə 496 min 127 manat 67 qəpik ödəyəcək.
Alınacaq avadanlıqlar arasında əsasən notbuklar üstünlük təşkil edəcək. Mərkəzi Bank 120 ədəd notbuk, 60 ədəd monitor, 5 ədəd printer, 3 ədəd planşet və s. avadanlıqlar alacaq.
Məlumat üçün bildirək ki, tenderin qalibi olan “ATA Texnologiya” MMC 15.10.2004-cü il tarixində dövlət qeydiyyatına alınıb. Nizamnamə kapitalı 100 000 manat olan MMC-nin hüquqi ünvanı Nəsimi rayonu, Şəmsi Bədəlbəyil, ev 102-də yerləşir. MMC-nin qanuni təmsilçisi Yusifov Mais Əmir oğludur.
Qeyd edək ki, “ATA Texnologiya” MMC-nin rəsmi saytında şirkətin 2004-cü ildə “AtaHolding” MMC tərəfindən təsis edildiyi bildirilir.
Uzun illər mətbuatda “AtaHolding” şirkətinin 2022-ci ilin noyabr ayında İstanbulda vəfat edən sabiq vergilər naziri Fazil Məmmədova bağlı olması barədə məlumatlar yayılıb. 20 yaşından (1983-cü il təvəllüdlü) “AtaBank”da çalışan və 2016-cı ildə bankın İdarə heyətinin sədri vəzifəsinə təyin olunan Dəyanət Quliyev sabiq nazirin bacısı oğludur. Yeniavaz.com