Mayda əfv və amnistiya olacaq-hüquq müdafiəçiləri

Gələn ay Azərbaycanda amnistiya aktının qəbulu və əfv sərəncamının veriləcəyi gözlənilir. Mayın 10-da mərhum prezident Heydər Əliyevin anadan olmasının 95 illiyi və 28 mayda Xalq Cümhuriyyətinin yaranmasının yüz illiyi ilə əlaqədar belə önəmli qərarlara şahidlik edə bilərik.

Bu günlərdə AŞ PA həmməruzəçilərinin iyunun ilk yarısında ölkəmizə səfər edəcəkləri barədə xəbərlərin yayılmasının təsadüf olmadığı vurğulanır. Əslində bu səfərin əfv və amnistiyadan sonraya məqsədli şəkildə salındığı və bunlar baş verərsə, həmməruzəçilərin hesabatında bunların əksini tapacağı bildirilir. Məhz bu səbəbdən Azərbaycan iqtidarının Avropa ilə münasibətlərini yaxşılaşdırmaq üçün səfərə qədər əfv sərəncamını imzalayacağı, amnistiya aktının isə qəbul olunacağı qeyd olunur.

İnsan Haqları üzrə Birgə İşçi Qrupunun üzvü Səidə Qocamanlı da çox ümidlidir: “Həmməruzəçilərin səfəri təəccüblü deyil. Bu sadəcə onların işgüzar səfəridir. Onlar zaman-zaman Azərbaycana gəlirlər. Bakıda olduqları zaman dövlət rəsmiləri, hüquq müdafiəçiləri və mətbuat nümayəndələri ilə görüşürlər. Topladıqları məlumatları illik hesabatlarına daxil edirlər. Azərbaycan Avropa Şurasına daxil olandan belə səfərlər çox olub, bundan sonra da olacaq. İndi əsas olan bu səfərin nə ilə nəticələnəcəyi barədədir. Bu suala cavab vermək üçün səbirsizliklə may ayını gözləməliyik. Biz də gələn ay əfv və amnistiyanı gözləyirik. Sızan məlumatlara əsasən, bu olmalıdır. Mənə elə gəlir ki, Azərbaycan böyük bir bayram astanasında olduğu üçün əfv və amnistiya çox yerinə düşmüş olardı. Hər halda Cümhuriyyətin yüz illiyi hər zaman olmur. Humanistliyi özündə birləşdirən bayramda bu qərarların olması çox sevindirici olardı. Ümid edirəm ki, bunlar baş verdikdə Əfv Komissiyasına göndərdiyimiz siyahı, eləcə də, prezidentə çoxsaylı şəxslərin imzaları ilə ünvanladığımız məktubdakı xahişimiz nəzərə alınacaq.

Siyahımızda olan şəxslərin böyük qisminin azad ediləcəyinə inanırıq. Bu həmməruzəçilərin iyun səfərinə hökmən təsirini göstərəcək. Bizə məhbuslar tərəfindən hazırda da ərizələr gəlməkdədir. İşçi Qrupu tam tərkibdə toplana bilməsə belə, ora daxil olan hüquq müdafiəçiləri hər həftə toplaşırlar. Şikayətlərə baxaraq, lazımı instansiyalara məktublarımızı göndəririk. Amma söhbət hazırlanan müxtəlif siyahılardan gedirsə, deyə bilərəm ki, bizim siyahı daha yığcamdır. Bu baxımdan siyahımızın nəzərə alınacağına ümid edirik. Bu mütləq olmalıdır, bundan o yana heç nə qalmayıb. Siyasi məhbus problemi Azərbaycan üçün birdəfəlik qapanmalıdır. Bundan sonra həmməruzəçilər Azərbaycana gələndə onların əsas məqsəd qayəsi Qarabağ olmalıdır, siyasi məhbus problemi yox. Çiynimizdə on illərlə daşıdığımız yükdən azad olmalıyıq. Bunun üçün beynəlxalq təşkilatların yardımı çox vacibdir”.

Hüquq müdafiəçisi Mirvari Qəhrəmanlı razılaşma əsasında əfv və amnistiyanın olacağını düşünür: “Ölkədə əfv və amnistiya olmasa belə, həmməruzəçilər gələcəklər də, gedəcəklər də. Əfv və amnistiyanın olacağını düşünürəm. Hesab edirəm ki, bunun üçün əvvəlcədən razılaşma da olub. Əksər siyasi məhbuslar buraxılacaq. Məruzəçilər gəlib ölkədə qalmayan vətəndaş cəmiyyəti  nümayəndələri, hökumət və “müxalifətlə”görüşəcəklər”. (Musavat.com)