“Fəaliyyətində nöqsan olan icra başçıları işdən çıxarılmalıdır. Hesab edirəm ki, prezident bununla bağlı ciddi addımlar atacaq”
Bunu açıqlamasında millət vəkili Vahid Əhmədov deyib.
Deputat Hesablama Palatasının apardığı yoxlamalar nəticəsində bəzi icra hakimiyyətlərində nöqsanların ortaya çıxdığını bildirib.
“Hesablama Palatasının apardığı yoxlamalarda korrupsiya halları aşkarlanır. Onlar arasında icra hakimiyyətləri də var. Mütəmadi olaraq palatanın hazırladığı materiallara baxış keçirilir və dövlət tərəfindən qərarlar verilir. Hesab edirəm ki, bu barədə müəyyən inzibati tədbirlərin görülməsinə ehtiyac var. İcra hakimiyyəti orqanında mənimsəmə, korrupsiya faktları varsa, həmin şəxs vəzifədən kənarlaşdırıla və məsuliyyətə cəlb olunmalıdır. Bu dövlət rəhbərinin mövqeyindən asılı olan məsələlərdir”,-deyə deputat vurğulayıb.
Qeyd edək ki, Hesablama Palatasının apardığı yoxlamalar zamanı bəzi icra hakimiyyətlərində ciddi nöqsanlar aşkar edilib. Məlum olub ki, dövlət tərəfindən ayrılan vəsaitlər düzgün istifadə olunmayıb, büdcə vəsaitlərinin təyinatı dəyişdirilib, əmək haqqının hesablanılması zamanı əlavə və artıq ödənişlərə yol verilib. Söhbət Mingəçevir, Səbail və Xaçmaz rayonlarından gedir. Həmin rayonlara Niyazi Bayramov, Şəmsəddin Xanbabayev və Eldar Əzizov rəhbərlik edir.
Azinforum.az dövlət vəsaitinin təyinatı üzrə düzgün xərclənməməsi ilə bağlı sözügedən 3 rayon haqda maraqlı dəqiqləşdirmə aparıb. Məlum olub ki, Mingəcevir və Xaçmazın icra başçıları uzun müddətdir ki, tutduqları vəzifəni icra edirlər. Bu səbəbdən də, dövlət qurumun aşkarladığı ciddi nöqsanlara görə, onların özləri cavab verməli olacaqlar. Müəmma Səbaill rayonu ilə bağlıdır. Çünki həmin rayonun icra başçısı ötən ilin sentyabr ayının 2-sində dəyişdirilib. Ölkə başçısının imzaladığı fərmana görə, həmin tarixdə Eldar Əzizov Səbail rayonunun icra başçısı təyin edilib. Həmin dövrə kimi icra başçısı olan Asif Əskərov isə, Bakının Nəsimi rayonuna rəhbər təyin olunub. Maraqlıdır, aşkarlanan yeyinti ilə bağlı məsuliyyəti kim daşıyır – Eldar Əzizov, yoxsa, Asif Əskərov?
Hesablama Palatasının apardığı yoxlamalar ötən ili əhatə etdiyi üçün, məntiqlə ortaya çıxan mənimsəmə faktına görə, Asif Əskərov daha çox məsuliyyət daşımalıdır. Çünki Eldar Əzizov həmin rayona ötən ilin son aylarında təyin olunub. Hər halda, məsələyə daha dəqiq qiyməti əlaqədar qurumlar verəcək.
Rövşən ƏLİ
Azinforum.az