“Evli bir qadına vurulmuşam… – NƏ EDİM?..”

Bəzən qəlbində iman işığı, vicdan şöləsi olan cavanlar dostlarına və ya ərk etdiyi böyüklərə, din adamlarına belə sual edir:”Gizli şəkildə ailəli bir qadına vurulmuşam – nə edim?”.

Bildiyiniz kimi, insan özündən asılı olmadan qəlbində yaranan, nəfsinin və ya Şeytanın vəsvəsə etdiyi hiss və düşüncələrə görə məsuliyyət daşımır. Ancaq  bununla belə, bir insan özünə ləzzət verdiyi üçün şüurlu şəkildə formalaşdıraraq meydana gətirib üzə çıxardığı düşüncələrə cavabdehdir.

Əgər bir kişi təsadüfən gördüyü naməhrəm bir qadını sonradan xəyalına gətirirsə və onunla necə əlaqədə olduğunu bilərəkdən, qəsdən təsəvvüründə yaradırsa, bu, gerçəkdən həmin əməli etməkdən az olsa da, artıq bir günahdır.

“Siz ürəyinizdə olanı zahirə çıxarsanız da, çıxarmasanız da, Allah ona müvafiq sizinlə haqq-hesab çəkər. (Allah) istədiyini bağışlar, istədiyinə də əzab verər. Allah hər şeyə qadirdir! (Qurani-Kərim, Əl-Bəqərə surəsi, 284-cü ayə).

Evli bir qadına aşiq olmağa gəldikdə isə, bir kişi özündən asılı olamadan bu cür hissə qapıla və ya ürəyində belə bir meyl göstərə bilər. Düzdür, insan iradəsinin xaricində olana görə məsuliyyət daşımır. Ancaq öncə dediyimiz kimi, əgər o, bu hissləri şüurlu şəkildə özünə aşılayırsa və həmin duyğular ona ləzzət verirsə, bu, artıq bir günahdır. Peyğəmbərimiz (səlləllahu əleyhi və alihi və səlləm) buyurub:

“Kim evli bir qadını yoldan çıxararsa,  o, bizdən deyil…”

Və belə demək də doğru deyil: “Mən elə bir şey etmirəm, yalnız bir sevgi  duyğusu yaşayıram”.  Bu, artıq zinaya yaxınlaşmaq, ona doğru addım atmaqdır. Çünki belə düşüncələrin ardının həmin naməhrəm qadını yoldan  çıxarmaq olacağı ehtimalı çoxdur.

”Zinaya da yaxın düşməyin. Çünki o, çox çirkin bir əməl və pis bir yoldur!”( İsra,32)

Allah hamımımızı günaha, harama girməkdən qorusun!..