Lənkəranda dəniz kənarını zibilləyən istirahət məkanlarının sahibləri cəzalandırıldı

Lənkəranda antisanitar şərait yaradanlar aşkarlanıb.

Oxu.Az-ın bölgə müxbirinin verdiyi xəbərə  görə, Lənkəran Şəhər Rayon Polis Şöbəsinin əməkdaşları tərəfindən sanitar-gigiyena qaydalarının pozulması hallarının qarşısının alınması məqsədilə mütəmadi tədbirlər həyata keçirilir.

Bu cür tədbirlər nəticəsində Lənkəran şəhərinin Kiçik Bazar adlanan ərazisində dəniz kənarında fəaliyyət göstərən “Ləzzət” və “Gəl arada bir” adlı istirahət məkanlarından tullantıların ətrafa atılması faktı aşkar edilib və bununla bağlı Fazil Həsənov və Kazım Mustafayev barəsində İnzibati Xətalar Məcəlləsinin 266.3-cü (Məişət tullantılarının tutumlardan (urnalardan) kənar yerlərə atılmasına görə) maddəsinin tələbini pozduğuna görə protokol tərtib edilib.

Eyni zamanda Lənkəran şəhəri Böyük Bazar ərazisində də aşkarlanan analoji fakta görə, Nadir Məmmədov barəsində İXM-nin 266.3-cü maddəsi ilə inzibati protokol tərtib olunub.