Braziliya klubu Kriştianu Ronaldunu transfer etmək istəyir

Braziliyanın “Korintians” klubu İngiltərənin “Mançester Yunayted” klubunun hücumçusu Kriştianu Ronaldunu transfer etməkdə maraqlıdır.

Bu barədə klubun prezidenti Duilio Monteyro məlumat verib.

O bildirib: “Bəli, mən onun yanımızda olmasını istərdim. Özümü “Korintians” üçün daha yaxşı ola biləcək hər şeyi sınamağa borclu hesab edirəm. Bilmirəm, alınacamı? Biz bu istiqamətdə heç bir addım atmamışıq. Amma ayıq-sayıqıq. Birdən Ronaldu Braziliyada oynamaq istəyər”.

Ronaldu 2021-ci ilin payızının əvvəlində “Mançester Yunayted”ə qayıdıb. Futbolçu 2021/22 mövsümündə “qırmızı şeytanlar”ın heyətində 39 oyun keçirib, 24 qol vurub və 3 məhsuldar ötürmə edib.