Keçmiş polis rəisi qadınlara qarşı zorakılıqdan danışdı: “Cinayət tərkibli əmələ polis göz yuma bilər?”

Son günlər Azərbaycanda qadınlara qarşı şiddət, zorakılıq hallarının artması, hətta ailə münaqişəsi zəminində qadınların ərləri tərəfindən öldürülməsi cəmiyyətdə ciddi narahatlıq yaradıb. Müzakirələr zamanı iddia edilir ki, bir sıra hallarda polis tərəfindən mental dəyərlər əsas tutulur, ailə dağılmasın, barışıq olsun deyə qadın zorakılığına göz yumulur, qadının təhlükəsizliyi tam qorunmur, polis tərəfindən ailələrə güzəşt edilməsi sonda qadınların öldürülməsi ilə nəticələnir…

Sabiq polis rəisi, hüquqşünas Mahmud Hacıyev isə Pravda.az-a müsahibəsində səslənən fikirlərlə razılaşmadığını deyib.

““Polis göz yumur”, “polis ölçü götürmür, ona görə nəticəsi belə olur”, “polis mental dəyərlərə toxunmaq istəmir” kimi fikirlər düzgün yanaşma deyil. Cinayət tərkibli əmələ polis göz yuma bilər? Polis cinayətkarlara qarşı kifayət qədər mübarizə aparır. Belə hadisələr həmişə olub. Qadın da kişiyə qarşı zorakılıq edir. O qədər fakt olub ki, qadın kişini bıçaqla, odlu silahla vurub. Cinayətdir də, baş verib. Sadəcə, burada bir məqam var – əvvəllər ailə münaqişəsi ilə əlaqədar məhkəmədə, polisdə şikayət ərizəsi olubsa, onda xidməti tədqiqat aparırlar ki, əvvəllər bu ailədən ərizə ilə müraciət olunub, ərizəni götürəndə niyə düzgün araşdırmamısınız, nəticəsi də belə olub. Bu, çox az hallarda baş verir. Belə yanaşma düzgündür. Yəni ailə münaqişəsi zəminində baş vermiş cinayət tərkibli əmələ görə əvvəllər ailə üzvlərindən kimsə ərizə ilə hüquq-mühafizə orqanlarına müraciət etdiyi halda düzgün yanaşma olmayıbsa, sonda ağır hadisə baş veribsə, onda xidməti tədqiqat aparılır. Bu da çox az-az hallarda olur. O demək deyil ki, polis mental dəyərlərə görə bunu edib. Xeyr, beş barmağın beşi də bir olmur. Təcrübəli, savadlı işçilər də olur, təcrübəsiz, savadsız da. Belə yanaşmaq lazımdır. Yoxsa polisin qadın zorakılığına göz yumması düzgün yanaşma deyil. Cəmiyyət varsa, cinayət də olmalıdır. Cinayətsiz cəmiyyət olmur. Bunun qadına, ya kişiyə qarşı olmasının fərqi yoxdur. Mənim təcrübəmdə də olub. Müraciət edirdilər, tədbir görürdük. Burda nə var ki? Araşdırırdıq, sonunun pis nəticəyə səbəb ola biləcəyini görürdüksə, ölçü götürülürdü”.