“Qarabağ”ın baş məşqçisi Qurban Qurbanov Konfrans Liqasının pley-off mərhələsindəki rəqibləri “Gent”in yerli çempionatdakı oyununu izləmək üçün Belçikaya gedəcək.
Bu barədə qol.az saytına açıqlamasında “Qarabağ”ın mətbuat xidmətinin rəhbəri Gündüz Abbaszadə bildirib.
O deyib ki, Qurban Qurbanov yanvarın 14-də Belçikaya yola düşəcək. O, klubun video-analitik məşqçisi Yanuş Vasilyevlə birgə yanvarın 15-də “Gent” – “Kortriyk” qarşılaşmasını tribunadan izləyəcək”.
Qeyd edək ki, “Gent” – “Kortriyk” görüşü yanvarın 15-i Bakı vaxtı ilə saat 19:00-da başlayacaq. “Gent” hazırda Belçika çempionatında 31 xalla 5-ci, “Kortriyk” isə 18 xalla 15-cidir. Xatırladaq ki, “Qarabağ” Belçika təmsilçisinə qarşı ilk matçını fevralın 16-da evdə, cavab qarşılaşmasını isə fevralın 23-də səfərdə keçirəcək.