Maliyyə Bazarlarına Nəzarət Palatasında çatışmayan nədi – ŞƏRH

Maliyyə Bazarlarına Nəzarət Palatası publik hüquqi şəxsinin Direktorlar Şurası ləğv olunub. Bu, Prezident İlham Əliyevin təsdiqlədiyi Palatanın yeni nizamnaməsində əksini tapıb.

Azərbaycan Dövlət İqtisad Universitetinin (UNEC) professoru Elşad Məmmədov Sputnik Azərbaycan-a deyir ki, bu qərar faktiki olaraq Maliyyə Bazarlarına Nəzarət Palatası rəhbərliyinin öz üzərinə düşən missiyanı yerinə yetirməməsinin göstəricisidir:

“Palata bank-maliyyə sektorunda formalaşmış ciddi struktur problemlərinin həlli üçün yaradılmışdı. Bu gün kommersiya banklarının həm aktivlərinə, həm də passivlərinə nəzər salsaq görərik ki, problemlər hələ də qalmaqdadır. Banklar fatiki olaraq real sektorun maliyyələşməsindən çəkilib. Palatanın geniş səlahiyyətlərinə baxmayaraq, qarşısına qoyulmuş əsas məqsədə nail ola bilmədi. Rəhbərlik ekspert cəmiyyətinin, bu sahədə tanınmış alimlərin heç bir məsləhətindən istifadə etmədi. Sözsüz ki, bu da bank sektorunda problemlərin həllinə yönəlik siyasətin formalaşmamasının əsas səbəblərindən biridir”.