“Bayramların əvvəlki dadı-duzu qalmayıb”.
Bu sözləri Yenisabah.az-a açıqlamasında yazıçı Seyran Səxavət deyib.
Onun sözlərinə görə, insanlar arasında həmin münasibət qalmayıb:
“Çünki əvvəlki insanlar yoxdur. Ona görə də insanlar arasında münasibət sıradan çıxır. O vaxtki ovqat da artıq qalmayıb. 5 il bundan öncə başqa münasibət idi. Çünki dövr başqa idi. İndi isə tamam başqadır. Bir onu bilirəm ki, yaxşılığa doğru getmirik”.
Yazıçının sözlərinə görə, texnologiya insanları bir-birindən uzaqlaşdırıb:
“Bunun bir çox səbəbləri var. Əsas səbəb texnologiyadır. Telefon, internet, televiziyalar insanları bir-birindən ayrı salıb. Telefonla təbrik olar?! Sanki onlayn bayram qeyd edirik.
Bayram birlik deməkdir. Yadıma gəlir ki, uşaq olanda kəndimizdə yaxın dost-tanışa pay aparırdıq. Münasibətdə olurduq. İndi isə təbriki belə telefonla edirlər.
Onlayn məhəbbət, ünsiyyət olar?! Heç dərs də olmaz. Vaxt var idi ki, bayrama 1 ay qabaqdan hazırlaşardıq. İndi isə elə bil adi gündür”.
S.Səxavət qeyd edib ki, 30 il qabaqki bayram ovqatını axtarmaq ağılsızlıqdır:
“Builki Novruz bayramında 30 il bundan qabaqkinin ovqatını axtarmaq düzgün deyil. Hələ şükür edək ki, bu bayram qalıb”.