Perinatal Mərkəzin sabiq direktoru 7 körpənin öldüyü yanğınla bağlı ifadə verdi

“Respublika Perinatal Mərkəzi”ində 7 körpənin öldüyü yanğınla bağlı ittiham olunan direktor və şöbə rəislərinin cinayət işi üzrə məhkəmənin növbəti iclası keçirilib.

Bu gün Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi keçirilən prosesdə təqsirləndirilən Mehriban Abasquliyeva ifadəsini davam etdirib.

İtthamda onun süni şəkildə xəstə sayını artırdığı qeyd olunub, lakin onun məqsədi xəstə sayını çoxaltmaq yox, dövlət büdcəsinə qənaət etmək olub: 

"Məni illik stasionar cərrahi əməliyyatları artırmaqla qazanc əldə etməkdə, TƏBİB-dən əlavə pul almaq üçün xəstələrin sayını süni şəkildə artırmaqda ittiham edirlər. Lakin mən sadəcə, müalicə xidmətinin keyfiyyətini yüksəltmişəm. Ölkədə bu tip mərkəzlərin sayı azdır, müraciət isə çoxdur.

Ümumiyyətlə, xəstələrin sayını artırmaqla bizim xəstəxananın kateqoriyası yüksəlmir, yəni əlavə heç nə əldə etmirik. Bizdəki artıq xəstə sayı bölgələrə nisbətdə daha az olub. Heç bir xəstəxananın qəbul etmədiyi, doğuşuna az qalmış xəstələrə rədd cavabı vermək düzgün deyildi. Onlara hər yerdən imtina cavabları gəlirdi. Bütün bunlara görə mənə təşəkkür edilməli idi, lakin ittiham olunuram. Digər ittihamlara gəldikdə isə, xəstələrin hansı palatada yerləşdirilməsinə, onların hansı avadanlıqlarla müalicə edilməsinə mən yox, baş həkim Dilarə Şirinova cavabdeh idi. Yanğın olanda xadimələr yenidoğulmuşları bir palatadan digərinə - yanğın baş verən palata ilə üzbəüz otağa daşıyıblar. Bütün bunlar mənim vəzifə səlahiyyətlərimlə əlaqəli olmayıb".

Növbəti proses martın 11-nə təyin edilib.

2024-cü il yanvarın 9-da “Respublika Perinatal Mərkəzi” PHŞ-nin inzibati binasında yanğın baş verib.

Yanğınla bağlı Baş Prokurorluqda Cinayət Məcəlləsinin 225.3 (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) və 314.3-cü (səhlənkarlıq iki və daha çox şəxsin ölümünə səbəb olduqda) maddələri ilə cinayət işi başlanaraq ibtidai istintaqın aparılması Baş Prokurorluğun İstintaq idarəsinə tapşırılıb.

İstintaqla müəyyən olunub ki, Mərkəzin Anesteziologiya, reanimasiya və intensiv terapiya şöbəsinin Yenidoğulmuşların intensiv terapiya bölməsinin yerləşdiyi dördüncü mərtəbədəki palatasında baş vermiş yanğın nəticəsində 7 yenidoğulmuş ölüb, 4 nəfər xəsarət alıb, müəssisəyə isə ümumilikdə 361 min manat məbləğində maddi ziyan vurulub.

Bundan başqa, Mehriban Abasquliyevanın 27 dekabr 2022-ci il tarixdə Mərkəzin direktoru təyin edilməsindən sonra müəssisənin tibbi təminat resursları və potensialını nəzərə almadan xəstə qəbulu sayını iki dəfəyədək artırması nəticəsində müəssisənin elektrik təsərrüfatının artıq yüklənərək sonda yanğına səbəb olmasına əsaslı şübhələr müəyyən edilib.

Eyni zamanda istintaqla, Fövqəladə Hallar Nazirliyi tərəfindən Mərkəzdə yoxlamalar aparılaraq yanğın təhlükəsizliyi qaydaları, xüsusən də, mövcud avtomatik yanğın xəbərverici siqnalizasiya qurğusunun nasazlığı, daxili yanğın su kranlarının işlək olmaması və elektrik təsərrüfatında nöqsanların olması Mərkəzin rəhbərliyinə bildirilsə də, direktor və Mərkəzin Anesteziologiya, reanimasiya və intensiv terapeya şöbəsinin müdiri Hamlet Mustafayev və Dəstək Xidmətləri şöbəsinin müdiri Elnur Əhmədlinin nöqsanları aradan qaldırmamalarına əsaslı şübhələr müəyyən edilib.

Mərkəzin direktoru vəzifəsində işləmiş Mehriban Abasquliyeva Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə) və 225.3-cü (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddələri, həmin mərkəzin şöbə rəisləri vəzifəsində işləmiş Hamlet Mustafayev və Elnur Əhmədli isə Cinayət Məcəlləsinin 225.3-cü maddəsi ilə təqsirləndirilən şəxs qismində cəlb edilərək onlara həmin maddələrlə nəzərdə tutulan ittiham elan edilib.

Xatırladaq ki, cinayət işi üzrə zərərçəkmiş qismində "Respublika Perinatal Mərkəzi", Elçin Gülmalı oğlu Nəcəfov, Vaqif İntiqam Hacıyev, Aynurə Qalib qızı Əhmədova, Gülbahar Zülfüqarova zərərçəkmiş qismində tanınıb.