Eldar Həsənovun “Ramiz Mehdiyev işi”nə cəlb edildiyi bildirilir

Hazırda həbsdə olan keçmiş baş prokuror və səfir Eldar Həsənov Prezident Administrasiyasının keçmiş rəhbəri Ramiz Mehdiyev barədə istintaqı aparılan cinayət işinə cəlb edilib. 

Bu barədə Həsənovun saxlanıldığı 9 saylı cəzaçəkmə müəssisəsindəki mənbədən Meydan TV-yə məlumat verilib.

Verilən məlumatda bildirilir ki, bir aya yaxındır o, Dövlət Təhlükəsizlik Xidmətinin (DTX) təcridxanasına köçürülüb.

Aidiyyatı qurumlar bu barədə hələlik heç bir açıqlama verməyiblər.

2001-2012-ci illərdə Azərbaycanın Rumıniyada, daha sonra isə Serbiya, Monteneqro, Bosniya və Herseqovinada səfir vəzifəsində çalışmış Eldar Həsənov 2020-ci il avqustun 13-də Bakıda DTX əməkdaşları tərəfindən saxlanıb.

Prezident onun həbsindən sonra səfir vəzifəsindən azad edilməsi haqda fərman imzalayıb.

Eldar Həsənov mənimsəmə, vəzifə səlahiyyətlərindən sui-istifadə etmə və s. ittiham edilib..

O, səfir olduğu ölkələrdə səfirlik üçün binaların alınması və s. layihələrin icrası zamanı yeyintilərə yol verməkdə təqsirli bilinib.

Həsənov 2022-ci ildə 10 il müddətinə azadlıqdan məhrum edilib.

Eldar Həsənov 1995-2000-ci illərdə Azərbaycanın Baş prokuroru olub.

Keçmiş səfir ittihamları qəbul etmir, özünü təqsirli bilmir.