Dəməşq və Moskva Rusiyanın Suriyadakı mövcudluğunun yenidən təşkili ilə bağlı memorandum imzalayıblar.
Bu barədə Suriyanın SANA xəbər agentliyi ölkənin Xarici İşlər Nazirliyinə istinadən məlumat yayıb.
Razılaşma mülki obyektlərin Suriyanın nəzarətinə veriləcəyini, Rusiya hərbi bazalarının isə birgə təlim mərkəzlərinə çevriləcəyini nəzərdə tutur.
Xarici İşlər Nazirliyi izah edib ki, Dəməşq Hmeymim hava limanının və Tartus limanındakı dördüncü ticarət körpüsünün mülki nəzarətini öz üzərinə götürəcək və bu da onların ölkənin mülki strukturuna tədricən inteqrasiyasına imkan verəcək. Tərəflər həmçinin hazırda hərbi məqsədlər üçün istifadə olunan obyektlərin rolunu nəzərdən keçirmək barədə razılığa gəliblər. Rusiya hərbi bazaları hər iki ölkənin maraqları nəzərə alınmaqla birgə təlim mərkəzlərinə çevriləcək.
Yeni müqavilələr üç aydan çox olmayan keçid dövründən sonra qüvvəyə minəcək. Xarici İşlər Nazirliyi qeyd edib ki, razılaşma Dəməşq və Moskva arasında on səkkiz aylıq danışıqlardan sonra əldə edilib.
Rusiya hakimiyyəti hələlik bu məlumatla bağlı şərh verməyib.
