Çeçenistan Respublikasının hakimiyyət orqanları gözəllik salonları və qadın geyimləri mağazalarının sahiblərindən bölgə rəsmiləri ilə görüş üçün qeydiyyatdan keçmələrini tələb edərək, tələblərə əməl etməyən müəssisələri bağlamaqla hədələyiblər.

“OC Media” yazır ki, bazar günü yayımlanan videoda Çeçenistan rəhbərinin köməkçisi Əmir Suqaipov görüşün birbaşa Ramzan Kadırovun göstərişi ilə olduğunu və “sakit dialoqu təmin etmək” üçün çəkiliş aparılmadan keçiriləcəyini bildirib.

Suqaipovun sözlərinə görə, görüşün məqsədi gözəllik və moda sektorunu “çeçen xalqının ənənəvi norma və mənəvi dəyərlərinə” uyğunlaşdırmaqdır. O, qeydiyyatın müəyyən edilmiş “WhatsApp” nömrəsi ilə aparıldığını söyləyib və “qeydiyyatdan keçməyən” salon və mağazaların məcburi şəkildə bağlanacağını vurğulayıb.

Çərşənbə axşamı Suqaipov yeni videomüraciət yayıb və bildirib ki, çağırışa yalnız hicab satan mağazaların sahibləri cavab verib. O bildirib ki, mesajın xüsusi olaraq ünvanlandığı şəxslər buna məhəl qoymayıblar.

Suqaipov qeydiyyat üçün son tarixi cümə axşamı təyin edib: “Bu, ikinci xəbərdarlıqdır. Üçüncüsü olmayacaq”.

O, əlavə edib ki, bütün çeçen xalqı təşəbbüsün nə qədər nəzakətlə və açıq şəkildə – təzyiqsiz, ultimatumsuz, dialoq təklifi ilə təqdim edildiyinin şahidi olub:

”Ancaq sən buna məhəl qoymamağı seçdin. Bu o deməkdir ki, siz bizim yanaşmamızın yumşaqlığını qiymətləndirməmisiniz. Vəziyyəti düzəltmək üçün düz iki gününüz var – cümə axşamına qədər”.

Hər iki bəyanat Suqaipov tərəfindən çeçen dilində lentə alınıb, lakin Çeçenistan dövlət xəbər agentliyi “Qroznı-İnform” tərəfindən təqdim edilən tərcüməyə əsasən sitat gətirilib.

2024-cü ilin dekabrında Çeçenistan rəhbəri Kadırov “müsəlman etikasının normalarını pozan” modellərdən istifadə edərək xidmətlərini təbliğ edən gözəllik salonlarının bağlanmasını əmr edib.

“Gözəllik salonları sosial media səhifələrində qadın modellərin bədənlərinin nümayiş etdirilməməsi lazım olan hissələrini göstərdiyi fotolar yerləşdirir. Korrupsionerlərin aid olduğu bu salonlar mütləq bağlanmalıdır”, – Kadırov şəxsi “Telegram” kanalında yayımlanan videoda bildirib.

2015-ci ildə idarələrarası komissiya Çeçenistanda gözəllik salonlarında geniş miqyaslı yoxlama aparıb, “sanitariya normalarını pozan” 80-dən çox müəssisə müəyyən edib və 100-ə yaxın inzibati iş qaldırıb.

Bu yazı ingilis dilindən tərcümə edilmişdir. Yazının əslini “OC Media”dan oxuya bilərsiniz.