“Bizim bölgə araq içməyi sevir, nə deyə bilərik ki...” - Elçin Şıxlı

Bu ilin ilk rübündə Azərbaycanda əhali alkoqollu içkilərə ayda adambaşına orta hesabla 2,35 manat xərcləyib. Bu göstərici ötən ilin eyni dövrü ilə müqayisədə 5 faiz artıb.

Dövlət Statistika Komitəsinin məlumatları əsasında yayılan rəqəmlərə görə, alkoqollu içkilərə ən çox vəsait xərclənən iqtisadi rayon Qazax-Tovuz olub.

Həmin bölgədə sakinlər ayda adambaşına orta hesabla 3,9 manat alkoqollu içkiyə pul sərf ediblər. Ən aşağı göstərici isə Lənkəran-Astara iqtisadi rayonunda qeydə alınıb – burada aylıq xərc cəmi 1,4 manat təşkil edib. Statistikaya əsasən, Bakı və Abşeron-Xızı iqtisadi rayonlarında bu göstərici 2,5 manat, Şəki-Zaqatalada 2,6 manat, Qarabağ və Naxçıvanda 2,4 manat, Quba-Xaçmazda 2 manat, Şirvan-Salyanda isə 1,5 manat olub.

Liberal İqtisadçılar Mərkəzinin sədri Akif Nəsirli də hesab edir ki, ölkənin qərb və şimal-qərb rayonlarında spirtli içki istehlakı daha yüksəkdir: “Tovuz, Qazax, Gədəbəy, Şəmkir, Balakən, Zaqatala kimi bölgələrdə və Rusiya ilə həmsərhəd olan digər ərazilərdə spirtli içki qəbulu digər rayonlarla müqayisədə daha çoxdur. Cənub zonasında isə əksinə daha az istifadə olunur. Çünki orada dinin təsiri daha çoxdur”. Statistikada yalnız rəsmi satışlar nəzərə alınır. Buna görə də ev şəraitində hazırlanan və qeyri-rəsmi yollarla satılan spirtli içkilərin həcmi rəqəmlərdə tam əks olunmur. Bu baxımdan bəzi bölgələrdə real istehlakın rəsmi göstəricilərdən daha yüksək ola biləcəyi istisna edilmir.