Cümə , Dekabr 4 2020
Ana səhifə / Şou Biznes / Qüdrət Həsənquliyev: “Bəzi məmurların riyakarlığına gəldikdə isə…”

Qüdrət Həsənquliyev: “Bəzi məmurların riyakarlığına gəldikdə isə…”

“BAXCP parlamentdə təmsil olunduğu bütün dövrlərdə mötədil müxalifət partiyası kimi orada alternativ fikri milli maraqlara uyğun, qərəzsiz və prinsipiallıqla təqdim edib. Parlamentin son iclası bunun təsdiqidir”.

Bunu Bütöv Azərbaycan Xalq Cəbhəsi Partiyasının (BAXCP) sədri Qüdrət Həsənquliyev bəzi sabiq deputatların parlamentdə fərqli fikir və alternativ mövqenin olmaması ilə bağlı iddialarına münasibət bildirərkən deyib.

Q.Həsənquliyev bildirib ki, bu mövqe “mən yoxamsa, hər şey pisdir” yanaşmasından qaynaqlanan xəstə təxəyyülün məhsuludur.

BAXCP sədri ölkənin böyük iqtisadi, siyasi və mənəvi böhran içində olması barədə fikirlərə də münasibət bildirib: “Ölkədə bütün sahələrdə problemlər var, bu, danılmaz faktdır. Amma böhranın olması barədə deyilənlər sadəcə cəfəngiyyatdır. Birincisi, böhran cəmiyyətdə o zaman yaranır ki, vətəndaşların böyük əksəriyyəti artıq əvvəlki kimi yaşamaq istəmir və vəziyyətin dəyişməsi üçün fəal mübarizəyə qoşulurlar. İkincisi, iqtidar daxilində fikir müxtəlifliyi yaranır, hakim partiyanın lideri komandasına nəzarəti itirir və yeni çağırışlara cavab verə bilmir. Bu zaman iqtidar komandasında gizli olaraq yeni lider axtarışına çıxırlar və böhranın əlamətləri görünməyə başlayır.

Hazırda Azərbaycanda bu əlamətlərin heç biri yoxdur. İnsanların böyük əksəriyyətini mövcud durum qane edir. Bizi tam qane etməsə də prezident müəyyən islahatlar aparır və insanlar inanır ki, islahatlar sürətləndiriləcək, hər şey yaxşıya doğru dəyişəcək.

Bundan başqa indi Azərbaycanda Heydər Əliyevi güclü siyasətçi və dövlət adamı kimi qəbul etməyən barmaqla sayılacaq qədər adam qalıb. Onlar da bağlı qapılar arxasında bunu etiraf edirlər. Vətəndaşlar əmindir ki, dövlət idarəetməsinin nə qədər çətin bir vəzifə olduğunu bilən Heydər Əliyev İlham Əliyevə güvənməsəydi, oğlunu belə bir çətin işin altına verməzdi. Hakim partiyanın üzvləri də görürlər ki, iqtidarda İlham Əliyevi əvəz edə biləcək ikinci bir şəxs yoxdur. Partiyada birləşdirici fiqur yalnız odur.

Bəzi vəzifəli şəxslərin riyakarlığına gəldikdə isə belələri bütün komandalarda olur və gec-tez ifşa olunur, layiqli cəzalarını alırlar. Qeyd etdiklərim təsdiq edir ki, böhran barədə deyilənlər özünü və başqalarını aldatmaqdan başqa bir şey deyil. Bunu əminliklə söyləmək olar. Böhran insanlara müxtəlif məhrumiyyətlər yaşada və dövləti təhlükəyə ata biləcəyi üçün biz onun gəlişini Cəmil Həsənov kimi sevinclə gözləmirik. Çalışırıq ki, problemləri və onların həlli yollarını göstərək” (APA).

Həmçinin oxuyun

“İşğaldan azad olunan torpaqlara ilk ayaq basanda “Qarabağ şikəstəsi”-ni ifa edəcəm”

Bu günkü musiqili qonağı tanınmış ifaçı Şəbnəm Tovuzludur. İfaçı bizimlə söhbətində Qarabağla bağlı arzularından və …

Bir cavab yazın