“O qədər öyrəşmişəm ki, o gün çaşıb kişiyə də “canımmm” demişəm”

– Aaz, gördün da, o şairlər gününə kimləri toplamışdılar…Nə yaxşı ki, sən gəlib çıxdın, yoxsa, yanımda kim oturacaqdı?

– Yaxşı fikirləş aaz, yadına sal görüm sən mənim yanımda oturmuşdun, yoxsa, mən sənin?

– Hə, mən tədbirə iki saat qalmış gəlmişdim, gördüm sən ordasan…

– Bəs, o biri tərəfində oturan o yumruburun arvad kim idi, sən də ona tərəf dönüb tez – tez “canımmm” deyirdin…

– Vallah, tanımadım, amma elə hey, ona – buna baxıb irişirdi. Axıradək fikir verdim, gözünün ucu ilə ona baxan da olmadı…

– Sən də ona “canımmm” deyirdin…

– Azz, bu söz feysbukdan ağzıma düşüb. O qədər öyrəşmişəm ki, o gün çaşıb kişiyə də “canımmm” demişəm. O da duruxıb qalıb, istədi həkim çağırsın, elə bildi dəli olmuşam…

– Yaxşı, o şairlər məclisində gözünə bir şair dəydi?

– Hə, canımmm, elə biri sən, mən hər gecə sənin şeirlərini oxumasam, gözümə yuxu getmir. Hətta, sənə bir – iki nəzirə də yazmışam.

– Aaz, dolamısan məni?

– Yoox, canımmm, doğru sözümdür…

– Mən ömrümdə şeir yazmamışam, doqquz roman müəllifiyəm. Heç bilirsən roman nədir?

– Niyə bilmirəm, canımmm, bir az uzun şeirə roman deyilir də…

– Kül ağlına, uzun şeirə poema deyirlər, roman çap olunanda qalın kitab kimi olur…

– Gəl, qucaqlaşıb bir şəkil çəkdirək, qoyaq feysbuka, görək bizi tanıyan olacaq…

– Yaxşı, bəlkə bu yanımızda oturan…

– Yox aaz, Allah vurubdu onu, elə ikimiz çəkdirək…

…Yarım saatdan sonra onların şəklini feysbukda 29 adam paylaşmışdı, 441 adam bəyənmişdi, 37 “dost” rəy bildirmişdi. “Canlarımmm”- 11 nəfər, “Qəşəydi”- 9 nəfər, “Təbinə sağlıq”- 7 nəfər, “Var olun”- 9 nəfər, “Mən sizin romanlarınızın hamısını oxumuşam, hələ də onların təsiri altındayam.”- 1 nəfər.

…Rəfiqələr rəyləri oxuyub qəh – qəhə çəkdilər. Biri o birindən soruşdu:

– Canımmm mənim, gör bizi nə qədər sevirlər, mükafatı isə başqalarına verirlər…Yaxşı, ən çox xoşuna gələn hansı rəy oldu?

– Axırıncısı. Doğrudur, doqquz roman yazmışam, amma onların heç biri hələ çap olunmayıb. Bu bədbəxt mənim romanlarımı görəsən haradan oxuyub ki, hələ də onların təsiri altındadır?..

– Fikir vermə, canımmm, əsas odur ki, bizi bəyənir və sevirlər!..