AzNews.az xəbər verir ki, müğənni öz ailəsi ilə birlikdə Quba-Qusar yolunda yerləşən istirahət mərkəzlərindən birində olub və oradakı qiymətlərin baha olduğundan gileylənib:

“Azərbaycan ən qeyri-mümkün mərasimləri, “Oskar”, “Grammy”, lap ABŞ prezidentinin inaqurasiyasını da keçirsə, bu servislə ölkəmizdə turizmin inkişafı olmayacaq. Son 2 həftədə 3-4 bölgəni qarış-qarış gəzirəm. Adamlar (sahibkarlar) rəsmən rəqabət aparmır. Müştərini qazanmaq həvəsi sıfır səviyyəsindədir. O həvəs haradan yarana bilər ki?! Rayondan bir “böyük” adam ərazini zolaq-zolaq zəbt edir. Obyektlərə də qohum-əqrəbasını müdir qoyur. Məkanlar nə səviyyədə işləyir işləsin, əsas odur ki, ərazi onundur”.

Sənətçi bildirib ki, istirahət mərkəzlərində antisanitariya baş alıb gedir:

“Antisanitariya, bahalılıq, zəif, ləng xidmət, nəticəyə uyğun olmayan qiymətlər…Baxıram ki, təbiətimizi Allah gözəl qələmiylə çəkib. Nə olsun? Qədrini bilməməkdəyik”.