Ana səhifə / Şou Biznes / Güllələnən iş adamının xanımı: “İcra başçısı halal mülkümü hərraca çıxarıb”

Güllələnən iş adamının xanımı: “İcra başçısı halal mülkümü hərraca çıxarıb”

“Himayəmdə I qrup əlilliyi olan uşağım, yaşlı, xəstə anam, qızım və əlilliyi olan qardaşım var. 11 yaşlı oğlum isə Daun sindromundan əziyyət çəkir.

Həyat yoldaşım qətlə yetiriləndən sonra ailəmə özüm başçılıq etməyə başladım. Gəncə Şəhər İcra Hakimiyyətinin və Gəncə şəhər Nizami Rayon İcra Hakimiyyətinin başçıları mənim adıma qanuni çıxarışı olan 1 hektar torpaq sahəmi vətəndaşlardan külli miqdarda pul alaraq sərəncamlar əsasında onlara satıblar. İndi mən nə torpağımı qaytara, nə də torpağımın pulunu ala bilirəm. Bu qədər də haqsızlıq olmaz”.

Bunu virtualaz.org saytına açıqlamasında 2011-ci il, iyunun 8-də Nəsimi rayonunda odlu silahla qətlə yetirilən iş adamı, Gəncə şəhər sakini Rövşən Rüstəmovun həyat yoldaşı Venera Rüstəmova deyib.

Gəncə şəhər rəhbərliyi tərəfindən hüquqlarının pozulduğunu deyən Venera Rüstəmova ölkə başçısından kömək istəyir.

Venera Rüstəmova deyir ki, onun bütün problemləri həyat yoldaşı Rövşən Rüstəmov güllələnəndən sonra başlayıb: “Rövşən iş adamı idi, tikinti ilə məşğul olurdu. 4 il əvvəl deputatlığa keçmiş namizəd Nadir Orucov tərəfindən qətlə yetirildi. Nadirin həyat yoldaşıma külli miqdarda borcu var idi. Başımız yasa qarışmışdı. Gəncədə yoldaşımın obyektləri, mənim adıma isə 1 hektar torpaq sahəsi var idi. Mənə zəng vurub dedilər ki, Gəncədəki torpaqlarınızı hərraca çıxarıb dədə malı kimi satırlar. Gəncəyə gedəndə mənə məxsus torpaq sahəsinin təbaşirlə işarələndiyini gördüm. Gəncə şəhəri Nizami rayonunun o vaxtkı icra başçısı Məharət Mustafayevin (2011-ci ilin iyun ayından 2014-cü ilin sentyabr ayınadək Nizami RİH başçısı vəzifəsində çalışıb-red.) və Gəncə Şəhər İcra Hakimiyyətinin başçısı Elmar Vəliyevin də qəbulunda oldum. Torpağımın məndən xəbərsiz satılmasının səbəbini öyrənmək istədim. Dedim ki, həyat yoldaşım rəhmətə gedib, əlimdə xəstə uşağım var, dul qadının çörəyi ilə oynamaq yaraşmaz.

Elmar Vəliyev cavabında dedi ki, torpaq sənindir, sənin torpağını heç kim sata bilməz, o torpağı sənə pay verdim. Onu da deyim ki, həyat yoldaşım həmin torpağı almağa 650 min manat pul vermişdi və əlimizdə çıxarış da var”.

Venera Rüstəmova

Sonradan Gəncə şəhər rəhbərliyi tərəfindən aldadıldığını deyən Venera Rüstəmova məhkəməyə müraciət edib. O, Gəncə İnzibati-İqtisad Məhkəməsində mülkiyyətində olan torpaq sahəsindəki tikintinin dayandırılması, torpağın əvvəlki vəziyyətinə gətirilməsi və ona dəymiş ziyanın ödənilməsi ilə bağlı iddia qaldırıb: “Bir müddətdən sonra gördüm ki, bizim torpağımızda artıq evlər tikilib. Hətta Gəncə Şəhər İcra Hakimiyyətindən onlara sərəncam da verilib. Bunu öyrənəndən sonra təkrar Elmar Vəliyevin qəbuluna getdim, amma bu dəfə məni qəbul etmədi. Mən də Gəncə şəhər Nizami Rayon İcra Hakimiyyəti ilə bağlı məhkəməyə müraciət etdim. Hər dəfə məhkəmədə icra hakimiyyətinin nümayəndələrindən vətəndaşlara verilən sərəncamların məhkəməyə təqdim olunması tələb edilsə də heç bir nəticəsi olmadı. Məhkəmələr mənim xeyrimə qərar çıxardı. Amma 3 ilə yaxındır məni süründürürlər”.

Venera Rüstəmova deyir ki, cavabdeh qismində məhkəmədə iştirak edən Gəncə şəhər Nizami RİH nümayəndəsi ona məxsus torpağı satmadıqlarını, heç kimə sərəncam vermədiklərini bildirib: “Amma biz öyrəndik ki, 15 nəfərə yaxın adama sərəncam verilib. Həmin adamlar özləri bizə deyib ki, torpağı icra hakimiyyətindən almışıq, pulu da onlara vermişik. Gəncə şəhər Nizami RİH tərəfindən verilən sərəncamlardan ikisini əldə etmişik, bir nüsxəsi bizdədir”.

Məhkəmə V.Rüstəmovanın iddiasını təmin edib. Gəncə İnzibati-İqtisad Məhkəməsinin 13 avqust, 2012-ci il tarixli qərarı ilə Venera Rüstəmovanın mülkiyyətində olan 1 hektar torpaq sahəsinə həbs qoyulub, həmin sahədə hər hansı tikinti işlərinin aparılması cavabdehə və digər şəxslərə qadağan edilib.

V.Rüstəmova isə icra hakimiyyətinin məhkəmənin qərarına məhəl qoymadığını deyir: “Belə görünür ki, Gəncədə qanunlar işləmir. Ona görə də halal mülkümə, “kupça”lı torpağıma kənardan baxa-baxa qalmışam. O vaxt rəhmətlik həyat yoldaşımın Rusiyadan gələn dostları həmin torpağın hamısı almaq istəyirdilər. Mən də satmaq istəyirdim, amma qoymadılar, bələdiyyə sədrini, icra hakimiyyətinin nümayəndələrini, polisi tökdülər. Öz torpağımı satmağa özümə imkan vermədilər. Bir hektar torpağımı zəbt ediblər, məni yiyəsiz görüblər.

Pozulmuş hüquqlarımın bərpası üçün Gəncə İnzibati-İqtisad Məhkəməsinə müraciət etdim. Məhkəmənin Gəncə şəhəri Nizami RİH-ə torpaq sahəmin verildiyi adamların siyahısının və bu barədə verilmiş sərəncamların surətlərinin tələb edilməsi haqda sorğularına məhəl qoyulmadı. Təəccüblüsü odur ki, eyni məzmunlu sorğulara Nizami rayonuna yeni təyin olunmuş icra başçısı Nizami Hacıyev də cavab vermir. Məqsədləri odur ki, özbaşınalıqlarının üstü açılmasın. Dövlət orqanları rəhbərlərinin məhkəməyə bu hörmətsizliyinə nə ad vermək olar? Mənim konstitusiya ilə qorunan mülkiyyət hüquqlarım icra hakimiyyətləri tərəfindən niyə tapdanır və onların haqqında heç bir cəza tədbiri görülmür?”

Şikayətçi deyir ki, Ali Məhkəmə məhkəmənin son qərarını Gəncə İnzibati-İqtisad Məhkəməsinə geri göndərib, hələ də işə baxılır: “Hazırda iş yenidən Gəncə İnzibati-İqtisad Məhkəməsindədir. Nizaminin icra başçısı isə inkar edir ki, biz o torpaqları satmamışıq. İki ildir məhkəmə icra hakimiyyətinə sorğu göndərir ki, sərəncamları üzə çıxarın. Amma məhkəməni də saya salmırlar. Mənim torpağımı satmışdılar, heç olmasa pulumu verəydilər”.

Aidiyyəti orqanlara dəfələrlə məktub göndərdiyini, amma heç bir nəticəsinin olmadığını deyən V.Rüstəmova son ümidinin dövlət başçısına müraciət ünvanlamaq olduğunu bildirir: “Cənab prezident! Sizin çıxışlarınızı dəfələrlə izləmişəm. Hər bir dövlət məmurunun xalqa xidmət etməli olduğunu deyirsiniz. Onların korrupsiyadan uzaq olmasını, heç bir vətəndaşı incitməməsini tələb edirsiniz. Bu da xalqın ürəyincədir. Bütün xalq bu məsələdə sizinlə həmfikirdir. Amma təəssüf ki, yerlərdəki bəzi dövlət məmurları sizing göstərişlərinizi icra etmir. Xahiş edirəm, mənə kömək edəsiniz”.

İddiaçının vəkili Sadiq Əfəndiyev isə virtualaz.org saytına açıqlamasında sözügedən məhkəmə prosesinin artıq 3 ildir davam etdiyini deyir: “Bu günədək işə baxan məhkəmələr Venera Rüstəmova ilə Gəncə şəhər Nizami RİH arasında yaranmış mübahisəyə qanuni nəticə verə bilməyiblər. Bunun da əsas səbəbi birinci və apelyasiya instansiyası məhkəmələri tərəfindən Venera Rüstəmovanın xeyrinə çıxarılmış qərarın Ali Məhkəmə tərəfindən ləğv olunması, işin yenidən baxılması üçün aşağı məhkəmələrə qaytarılmasıdır. Təbii ki, hər hansı bir işin uzunmüddətli məhkəmə araşdırması Avropa Konvensiyası ilə vətəndaşlarımıza verilmiş ədalətli məhkəmə araşdırması hüququ ilə bir araya sığmır. Ona görə də işə baxan məhkəmələr bu mübahisəyə ədalətli məhkəmə araşdırması hüququ və mülkiyyətin toxunulmazlığı prizmasından yanaşaraq mübahisənin tez bir zamanda qanuni həllinə nail olmalıdır”.

Səslənən bu iddialarla bağlı Gəncə şəhər Nizami Rayon İcra Hakimiyyəti ilə əlaqə saxladıq. Lakin RİH-dən bu məsələ ilə bağlı suallarımızı cavablandırmaq istəmədilər. Bununla belə qarşı tərəfin də mövqeyini işıqlandırmağa hazırıq.

Həmçinin oxuyun

“Məni 3 manatlıq şorbaya görə iftara dəvət etməyin”

“Məni 3 manatlıq şorbaya görə iftara dəvət etməyin”Müğənni Kərim Abasov onu iftar süfrəsinə dəvət edən …

Bir cavab yazın