Çərşənbə , Sentyabr 23 2020
Ana səhifə / Sosial / Telefon mağazalarında onlayn dərslərə görə ajiotaj yaşanır

Telefon mağazalarında onlayn dərslərə görə ajiotaj yaşanır

Ölkədə yeni tədris ilinin başlanmasına təxminən iki həftə qalır və bu dəfə məktəbli geyimi satılan mağazalarda yox, telefon dükanlarında ajiotaj müşahidə edilir.
Məlum olduğu kimi, sentyabrın 15-də tədris ilinin başlaması ilə ibtidai sinif şagirdləri həftədə 2-3 dəfə olmaqla dərsə gedəcəklər. Yuxarı siniflərin şagirdləri isə hələlik onlayn formada təhsil alacaqlar. Bu səbəbdən də valideynlər telefon mağazalarına yollanıb, övladlarının onlayn dərslərə qoşula bilmələri üçün telefon alırlar.
Çünki bir çox valideynlərin mobil telefonları ya köhnəlib, ya proqramlar ağır işləyir, donmalar olur, ya da onlayn dərs üçün zəruri olan sistemləri yükləyə bilmirlər.
Şagirdlərə isə sürətli, texniki imkanları yaxşı olan, dərs saatında onlayn şəbəkədən tez-tez ayrılmayan cihazlar lazımdır.
Ona görə mobil telefon, planşet satılan mağazalara yollananların sayı artıb. Valideynlər ya nağd, ya da kredit şərtləri ilə telefonlarını yeniləyirlər, ən müasirlərini almağa üstünlük verirlər.
Hazırda tanınmış mobil telefon dükanlarında ən çox Çin istehsalı olan telefonlar satılır. Satıcıların sözlərinə görə, müştərilər əsasən “Huawei”, “Xiaomi” kimi brendlərin modellərinə üstünlük verirlər.
Onların bildirdiyinə görə, əsasən də son üç gündə telefon satışında canlanma müşahidə olunur. Valideynlərə əsasən “Teams” proqramını yükləmək üçün yeni telefonlar lazımdır. Bu, şəbəkə onlayn dərslərin təşkilində ən universal, modern və operativ xidmətdir.
Həmin proqram vasitəsi ilə şagird özünü sinif otağındakı kimi hiss edir və yaşıl düyməni basmaqla onlayn şəkildə əlini qaldırmış, müəllimə sual vermək üçün icazə almış olur.
Satıcılar bildirirlər ki, köhnə telefonlar bu proqramı “Play market”dən ya yükləmir, ya da ağır sistem olduğuna görə dəstəkləmir.
Telefon dükanlarında danışırlar ki, zəmanə tam dəyişib, ötən ilə qədər bazarlarda məktəbli geyimi, çanta, dəftər-kitab, karandaş, qələm axtaran, dəridən-qabıqdan çıxan valideynlər bu il pandemiya şəraitində onlayn dərs üçün texniki vasitələrini təzələyirlər.
Qeyd edək ki, 1-4-ci siniflər üçün həftədə 2-3 dəfə olmaqla, tədris əyani formada təşkil ediləcək. 5-9-cu və 10-11-ci siniflər üçün 15 sentyabrdan tədris distant formada təşkil olunacaq. Oktyabrın 1-dən V-IX siniflərin 2 və ya 3 dəfə məktəbə əyani şəkildə gəlməsi nəzərdə tutulur.
Musavat.com

Həmçinin oxuyun

Məktəblərdə koronavirusla bağlı bu günə olan vəziyyət: 10 şagird yoluxdu

Təhsil Nazirliyi ümumi təhsil müəssisələrində bu günə COVID-19-la bağlı məlumat yayıb. Məlumata görə, sentyabrın 22-də 36 şagirddə …