Putin Ərdoğanla zarafatlaşıb: “Səninkilər işləmək istəmirlər” – VİDEO

Rusiya və Türkiyə prezidentlərinin Soçidə başlayan görüşündə maraqlı anlar yaşanıb.

RİA Novosti xəbər verir ki, liderlər Rusiya prezidentinin «Boçarev ruçey” iqamətgahının danışıqların keçiriləcəyi zalına daxil olarkən Türkiyə nümayəndə heyətində olanlardan bir neçəsi xeyli müddət onlar üçün ayrılmış yerləri tapa bilməyib.

Harada əyləşəcəklərinə qərar verə bilmədiklərindən prezidentlər söhbətə başlamaq üçün onları gözləməli olublar. Vladimir Putin isə yaranmış vəziyyətə yumorla müdaxilə edib və “səninkilər işləmək istəmirlər”, – deyə həmkarı Ərdoğanla zarafatlaşıb.

* * *15:13

Soçidə Rusiya prezidenti Vladimir Putin və Türkiyənin dövlət başçısı Rəcəb Tayyib Ərdoğan arasında görüş keçirilir.

“Report” bildirir ki, görüş zamanı V.Putin iki ölkə arasındakı münasibətlərin xüsusi status əldə etdiyini və tam bərpa olunduğunu bildirib.

R.T.Ərdoğan isə rəsmi Moskva və Ankaranın birgə səylərinin Yaxın Şərqdəki vəziyyətə təsir edə biləcəyini açıqlayıb.

* * *14:53

Türkiyə prezidenti Rəcəb Tayyib Ərdoğan Rusiyada rəsmi səfərdədir.

“Report” xəbər verir ki, Türkiyə prezidentinin göyərtəsində olduğu TUR özəl təyyarəsi Bakı vaxtı ilə saat 13:45-də Soçi şəhərinə enib.

Rəcəb Tayyib Ərdoğanı səfər zamanı baş nazirin müavini Mehmet Şimşek, xarici işlər naziri Mövlud Çavuşoğlu, enerji və təbii ehtiyatlar naziri Berat Albayrak, iqtisadiyyat naziri Nihat Zeybekçi, müdafiə naziri Fikri İşık və Türkiyə Silahlı Qüvvələri Baş Qərargahı rəisi Hulusi Akar müşayiət edir.

Türkiyə prezidenti mayın 3-də rusiyalı həmkarı Vladimir Putinlə təkbətək görüşəcək. Bunun ardınca prezidentlər, onları müşayiət edən rəsmi şəxslər birlikdə işgüzar nahar edəcək, sonra heyətlər arasında görüş olacaq.