Ana səhifə / Sosial / İranda soydaşlarımıza qarşı növbəti ayrı-seçkilik

İranda soydaşlarımıza qarşı növbəti ayrı-seçkilik

Sabir Rüstəmxanlı: “35 milyonluq bir xalq ayağa qalxıb haqqını tələb etsə…”; Fərəc Quliyev: “Bizə qarşı İran tərəfdən ögey münasibət hər zaman olub”

Son zamanlar İranda azərbaycanlılara qarşı ayrı-seçkiliyin artdığı müşahidə olunur. Bu hal Həsən Ruhaninin ikinci dəfə prezident seçilməsindən sonra daha da güclənib. Təsadüfi deyil ki, onun formalaşdırdığı yeni hökumət kabinetində bir nəfər də olsun azərbaycanlı təmsil olunmur.

Bundan əlavə, 2016-cı ildən fəaliyyət göstərən və 100 deputatdan çox üzvü olan Türk Bölgələri Fraksiyasının da ləğv olunduğu məlum olub. Bu barədə məlumatı Təbriz, Azərşəhr və Üskünün millət vəkili Şəhabəddin Bimiqdar verib.
Bu iki fakt fars rejiminin soydaşlarımıza qarşı nə qədər ayrı-seçkilik kampaniyası apardığını sübut edir. ABŞ-ın Rusiyaya qarşı məlum sanksiyalarının artmasından sonra İranın hakim dairələrinin ciddi əndişə içərisində olduqları görünür. Belə ki, İran hökuməti əsas müttəfiqi olan Rusiyanın sıradan çıxarılacağı təqdirdə Qərbin əsas hədəfinə çevriləcəyini yaxşı bilir və bununla da Cənubi Azərbaycanı itirəcəyindən ehtiyatlanır. 35 milyonluq bir xalqın əsarətindən çıxacağı halda varlığının təhlükə altına düşəcəyini rəsmi Tehran yaxşı bilir. Bundan əlavə, Cənubi və Şimalı Azərbaycanının birləşəcəyi halda qonşuluğundan daha bir güclü türk dövlətinin formalaşacağını Ruhani hakimiyyəti yaxşı anlayır. Məhz buna görə də soydaşlarımıza qarşı ayrı-seçkilik kampaniyasının miqyasını fars rejimi genişləndirir.

Bütün bununla bağlı Azərbaycan tərəfin artıq özünü bizə din və qan qardaşı kimi təqdim edən molla rejimi ilə bağlı sərt addımlar atmağının zamanının yetişdiyi barədə tələblər səslənməyə başlayıb. 35 milyonluq xalqın da susqunluğuna son qoymağı və öz haqqını tələb etməyi kimi tələblər də var.

Image result for VHP sədri, xalq şairi Sabir Rüstəmxanlı

VHP sədri, xalq şairi Sabir Rüstəmxanlı Azərbaycan türklərinin İranda zəif olduqlarını bildirdi: “Özümüz öz taleyimiz barədə yetərincə düşünə bilmirik, ondan ötrü mübarizə aparmırıq. 35 milyonluq bir xalq ayağa qalxıb haqqını tələb etsə, onu heç bir güc sındıra bilməz. Öz məktəbini açmaq, öz dilində oxumaq kimi tələblər oradakı türklər irəli sürsələr, öz hüquqlarını təmin edərlər. İranda dini rəhbər belə Azərbaycan türküdür. Sadəcə, İrandakı türklər öz iradələrini ortaya qoymalıdırlar. Görünür özləri zəifdir, başqa nə demək olar ki. Əgər onlardan az olan fars hər şeyi diktə edirsə, demək günah türkün özündədir. İranda türklərlə bağlı gedən prosesləri dünyada cərəyan edən proseslərə bağlanmasını istəmirəm. Ötən əsrdə 4 dəfə inqilab edilib. Bunların hamısı da millətin qanının tökülməsi ilə nəticələnib. İlk növbədə, millətin özü azadlığını dərk etməli və buna hazır olmalıdır. Bunlar olmasa, Rusiya nəsə dəyişəcək, yaxud Amerikada nəsə baş verəcək kimi havaları iyləməyin mənası yoxdur. Bu şəkildə qurtuluş əldə etmək mümkün deyil. Biz millətin öz taleyini düşünməsinə çalışmalıyıq”.

Image result for Milli Dirçəliş Hərəkatı Partiyasının sədri, deputat Fərəc Quliyev

Milli Dirçəliş Hərəkatı Partiyasının sədri, deputat Fərəc Quliyev tarix boyu İranda anti-Azərbaycan siyasətinin mövcud olduğunu qeyd etdi: hakimiyyətlər nə qədər dəyişirsə dəyişsin, bunun yanaşmaya təsiri yoxdur. İstər şah, istərsə də sonrakı dövrlər olsun. Dəfələrlə assimilyasiya siyasəti yürütməyə çalışıblar. Azərbaycanlılar yaşayan yerlərdə iqtisadi yöndə də fərqli yanaşmaları var. İnvestisiya qoyuluşuna mane olurlar. Ehtiyat edirlər ki, Güney Azərbaycanda istiqlal savaşının yeni dalğası başlasa, çox şey itirəcəklər. Bizə qarşı İran tərəfdən ögey münasibət hər zaman olub. İş başında Azərbaycan türkləri olsalar da, bunlar manqurtlaşmış tiplər olublar. Bunlar tamamən fars şovnizminə xidmət ediblər. İndiki hakimiyyət açıq şəkildə ayrı-seçkiliyə gedir. Kabinetin təşkilində Azərbaycan türklərinin iştirakına “qırmızı işıq” yandırdılar. Onlar nəinki Cənubi Azərbaycanın, heç Şimalı Azərbaycanın belə güclü olmasını istəmirlər. Hər zaman Ermənistana dəstək veriblər, bu gün də ermənilərə bir nəfəslik verirlər, Ermənistanın inkişafı üçün hər şeyi edirlər. İki müxtəlif dövlət olaraq, bir-birilərini qardaş adlandırmaqdan da çəkinməyiblər. Müsəlmançılıqdan danışırlar, amma Azərbaycan türklərinə qarşı münasibətləri ortadadır. Ermənistan torpaqlarımızı qəsb edib, lakin qəsb edilən torpaqlara investisiya qoymaqdan çəkinmirlər. İranın bu siyasəti təsadüfi deyil. Düşünürəm ki, bu ayrı-seçkilik siyasəti Güney Azərbaycanda istiqlal savaşının başlanması və bitməsinə qədər davam edəcək.

Oradakı soydaşlarımız haqsızlığa qarşı susmurlar. Zaman-zaman bunun şahidi olmuşuq. Təkcə ötən əsrdə baş verən dörd inqilab çox şeyi sübut edir. Hər zaman Azərbaycan türkləri öz sözlərini deyiblər. Heç bir millət bir əsrdə dörd dəfə istiqlal savaşına qalxıb nəticə əldə etməyib. Düşünürəm ki, rejim bu tarixi hadisələrdən qorxur, xalq da bundan örnək götürür. Bunun nəticələrinin olacağına inanıram. Azərbaycan hökumətini bu məsələdə başa düşmək olar. Ortada protokol qaydaları var. Beynəlxalq konvensiyalara uyğun hərəkət edilməlidir. Amma ictimaiyyətdən ciddi şəkildə təzyiqlər olmalıdır. Partiyalar ortaya bir savaş qoymalıdırlar. Bu proseslərə qarışmayan partiyalar adlarını Şimalı Azərbaycan İslam Partiyası qoymalıdırlar. Yox əgər Azərbaycan İslam Partiyası qoyursa, dünyanın hər yerində yaşayan azərbaycanlılara sahib çıxmağı bacarmalıdır. Güney Azərbaycandakı türklərə hərtərəfli mənəvi dəstək olmalıyıq. Qeyd edim ki, şərq üçbucağı dağılmaq üzrədir. Yaxın zamanlarda Rusiyanın çöküşü reallaşaq. Bu zaman bütün şər imperiyaları kimi İran imperiyası barədə də ölçü götürüləcək. Bu imperiyanın dağılması qaçılmazdır. Bu zaman bir neçə demokratik dövlətin yaranması da qaçılmaz olacaq”.

Həmçinin oxuyun

Başı yarılan uşağa yardım etməyən həkimlərlə bağlı qərar verildi

Jurnalist Məhərrəm Əliyev bir neçə gün öncə qardaşı oğlunun başından xəsarət aldığını, lakin xəstəxanaların heç …

Bir cavab yazın