“Elə məsələlər var ki, orada hegemon gücə malik olmayan ölkələrin də maraqları, təklifləri, rəyləri nəzərə alınmalıdır”
Vüqar Qədirov: “Əks təqdirdə bunun adı dünya birliyinin mövqeyi kimi ifadə oluna bilməz”
Azərbaycan Respublikasının Prezidenti İlham Əliyev Dünya Xəbər Agentliklərinin V Konqresi iştirakçılarının bir qrupunu qəbul edən zaman dünyanın adından kiminsə fərdi şəkildə danışmağa haqqı olmadığını bildirib:
“Siz dünya deyəndə kimi nəzərdə tutursunuz? Siz həmişə dünyanın adından danışmağı xoşlayırsınız. Mən 13 illik prezidentlik fəaliyyətim dövründə bunun şahidiyəm. Dünya hər hansı bir ayrılıqda götürülmüş ölkədən böyük məfhumdur. Biz çox zaman belə bir ifadəyə rast gəlirik ki, beynəlxalq birlik hansısa bir məsələdən narahatdır. O zaman müəyyənləşdirmək lazımdır, beynəlxalq birlik dedikdə nə nəzərdə tutulmalıdır? Beynəlxalq birlik BMT-yə üzv olan 200 ölkə deməkdir. Dünən mən öz çıxışımda da qeyd etdim ki, bu ölkələrin üçdə ikisi Azərbaycanı BMT-nin Təhlükəsizlik Şurasına üzvlük məsələsində dəstəkləmişdir. Mən dünənki çıxışımda onu da qeyd etmişdim ki, Azərbaycanda mətbuat azadlığı tam şəkildə təmin olunub. Bu məsələnin mahiyyətinə diqqət yetirmək kifayət edir. Ölkəmizdə əgər azad internet fəaliyyət göstərirsə, senzura yoxdursa, əhalinin 75 faizi internet istifadəçisidirsə, mətbuat azadlığının məhdudlaşdırılmasından necə danışmaq olar?! Əgər sosial şəbəkədə – “Feysbuk”da və “Tvitter”də 2 milyon insanımız varsa, mətbuat azadlığını necə məhdudlaşdırmaq olar?! Biz qarşımıza bu cür siyasi məqsəd qoymamışıq. Bizim məqsədimiz bütün azadlıqların təmin olunduğu, müasir, inkişaf edən, demokratik cəmiyyət quruluşunu davam etdirməkdən ibarətdir. Bu bütün digər azadlıqlara da şamil olunur. Məsələn, sərbəst toplaşma hüququ. Bəzən Azərbaycanı tənqid edirlər ki, bizdə sərbəst toplaşma hüququ yoxdur. Bu yanlışdır. Bunun üçün bu yay müxalifətin keçirdiyi mitinqlərə nəzər salmaq kifayətdir. Qeyd edim ki, onlar oraya çox adam yığa bilmədilər, onların sayı dünən Heydər Əliyev Mərkəzində keçirilən tədbir iştirakçılarının sayından az idi. Lakin onlar azad şəkildə toplaşmışdılar, heç bir məhdudiyyət yox idi. Bir daha qeyd edirəm ki, Azərbaycanda mətbuat azadlığı tam şəkildə təmin olunub. Ayrı-ayrı jurnalistlərlə bağlı olan məsələlərə kontekstdən kənar baxılmamalıdır. Ölkələrin çoxunda jurnalistlərin cinayət törətməsi halları baş verir və onlar istintaqa cəlb olunurlar. Biz bu məsələdə obyektiv olmalıyıq, məsələlərə obyektivlik mövqeyindən yanaşmalıyıq. Mən də sizə belə bir sual vermək istərdim: Azərbaycanı qeyd etdiyim məsələlərlə bağlı tez-tez tənqid edirlər, bəs siz mənə deyə bilərsinizmi ki, nəyə görə Culian Assanj hələ də Ekvadorun Londondakı səfirliyindədir? Culian Assanj bir neçə il bundan qabaq hansısa qadınla hansısa əlaqələrə görə ekstradisiya və ölüm cəzası təhlükəsi ilə üzləşib. O, iki ildən artıqdır ki, səfirlikdədir və çölə çıxmaqdan qorxur. Bunu necə izah edə bilərsiniz? Jurnalistlə bu cür rəftar etmək demokratikdirmi? Bu rəftara nə ad vermək olar?”.
İlham Əliyevin dünya birliyi ilə bağlı ortaya qoyduğu konseptual yanaşmanı necə qiymətləndirmək olar?
Ekspert Vüqar Qədirov qəzetimizə bildirdi ki, cənab Prezidentin bu məsələyə yanaşması tam obyektivdir: “Xüsusilə də bunu dünyanın tanınmış media resursları rəhbərlərinin diqqətinə çatdırması olduqca əhəmiyyətlidir. Çünki çox vaxt bizə təzyiqlərin dalğası məhz dünyanın tanınmış media nümunələri vasitəsilə başladılır. Məhz həmin KİV-lərdə dünya birliyi adından bəyanatlar verilir, yanaşmalar ortaya qoyulur. Azərbaycanın bu sahədə kifayət qədər təcrübəsi olduğu səbəbindən, artıq əsassız təzyiqlərlə bağlı bir imunitet mexanizmimiz var. Tamamilə doğrudur ki, kimsə və hansısa ölkə dünya birliyinin adından danışa bilməz. Buna haqq etmir. Dünya birliyi BMT-yə üzv olan bütün ölkələrdən ibarətdir. Bu məfhumu kimsə özününküləşdirib öz məqsədləri üçün istifadə edə bilməz. Elə məsələlər var ki, orada hegemon gücə malik olmayan ölkələrin də maraqları, təklifləri, rəyləri nəzərə alınmalıdır. Əks təqdirdə bunun adı dünya birliyinin mövqeyi kimi ifadə oluna bilməz. Hesab edirəm ki, cənab Prezidentin verdiyi təsnifat doğrudur və tam yerindədir”.
Məhəmmədəli QƏRİBLİ