Şənbə , İyun 25 2022
Ana səhifə / Sosial / Hökumət qaz və işığın qiymətini artıracaq?

Hökumət qaz və işığın qiymətini artıracaq?

“Hazırda ölkədə 20 faizdən yuxarı ərzaq inflyasiyası var. Hökumət də etiraf edir ki, çox güclü inflyasiya gedir ölkədə. Bu inflyasiya fonunda əhalinin nominal gəlirləri isə cəmi 14 faiz artıb. Real gəlirləri isə azalıb. Özü də kifayət qədər ciddi şəkildə azalıb. Bu məqamda kommunal xidmətlərin qiymətinin artması insanların sosial vəziyyətini daha da ağırlaşdırar. Xüsusən də qazın qiymətinin yenidən artması əhaliyə ciddi zərbə ola bilər. Onsuz da qiymət artımı ilə əlaqəli olaraq günü-gündən insanların sosial problemlərinin artdığının şahidi oluruq”.

Bunu Bakupost.az -a açıqlamasında iqtisadçı-ekspert Natiq Cəfərli deyib.
Onun sözlərinə görə, hazırda elə bir vəziyyətdir ki, dövlət tərəfindən tənzimlənən qiymətlərin artması insanların sosial vəziyyətinin daha da gərginləşməsinə səbəb ola bilər:

“İndiki məqamda təbii qazın, elektrik enerjisinin qiymətini artırmaq əhali üçün çox böyük zərbədir. Bu insanları daha ağır vəziyyətlə üz-üzə qoyar. İnanmıram ki, hökümət bu addımı ata. Hazırda Azərbaycanda büdcənin dolması problemi yoxdur. Çünki, neft-qaz kifayət qədər bahadır. Azərbaycan bu il son illərin ən yüksək neft-qaz gəlirlərini əldə edəcək. Əgər büdcənin doldurulması ilə bağlı bir problem yoxdursa, əhalinin aşağı olan sosial durumunu nəzərə alıb komunal xidmətlərin artırılmasına heç bir ehtiyac yoxdur”.

Ekspert qeyd edib ki, təbii qazın, elektrik enerjisinin, yanacağın qiymətinin ar­tması istər-istıməz bütün sahələrdə özünü göstərir: “Dövlət tərəfindən tənzimlənən qiymətlərin artması ölkədəki inflyasiya prosesini daha da sürətləndirə bilər. Təbii qazın qiyməti qaldırılsa, qaz istifadə edən istehsalçıların, kiçik və orta sahibkarların öz biznesini bağlamasına səbəb ola bilər. Hazırkı vəziyyətdə yanacağın da qiymətinin qalxması məsələsi real görünmür. Benzin və dizel yanacağının qiymətinin artması aztəminatlı əhali üçün çox böyük zərbə ola bilər. Hökumət buna getməz. Hesab edirəm ki, inflyasiya ilə əlaqədar bu il təbii qaz, elektrik enerjisi, yanacağın qiymətində artım olmayacaq”.

Həmçinin oxuyun

Azərbaycan Dövlət Aqrar Universitetində müasir, yoxsa keçmiş Sovet rejiminin təhsil modeli

Hər bir dövlətin gücü və qüdrəti tək onun təbii sərvətləri ilə deyil, məhz möhtərəm Prezidentimiz, …