Bakının qəsəbə yolları payız yağışına hazırdırmı? – VİDEO

Artıq yay mövsümünün sonlarını yaşayırıq. Qarşıda bizi yağışlı payız, qarlı boranlı qış ayları gözləyir. Hər bir fəslin özünəməxsus gözəlliyi var. Lakin paytaxtın bəzi ərazilərində yaşayanlar üçün payız-qış ayları ən arzuolunmaz mövsümdür.

Özlərinin dili ilə desək, yaxın günlərdə yağışların başlaması ilə onların da qara günləri başlayacaq.

Məsələ ilə bağlı ARB TV-nin efirində maraqlı süjet yayımlanıb.

Uzun illərdir paytaxt ərazisində, eləcə də ətraf qəsəbə və kəndlərdə sakinlərin ən çox qarşılaşdığı problemlərdən biri yolla bağlıdır. 

Payız-qış mövsümü başlayan kimi vətəndaşların dərdi sanki təzələnir. Yollar keçilməz palçıq olur, böyüklər işə, uşaqlar məktəbə iki, bəzən üç cüt ayaqqabı dəyişməklə gedib çıxırlar. 

Təbii ki, geniş bir layihə çərçivəsində Avtomobil yolları Dövlət Agentliyinin necə deyərlər təmirini davam etdirdiyi və planda növbəsini gözləyən küçələr var. Lakin bu il də yağışlı, qarlı havalarda palçıqlı yoldan keçmək məcburiyyətində qalanlar olacaq. Binəqədinin Məmiş Abbasov kimi bir çox küçələrinin sakinləri də bu taleyi yaşayacaq.