Ana səhifə / Sosial / Bakıda müxalifətin gizli görüşü keçirilib

Bakıda müxalifətin gizli görüşü keçirilib

Azərbaycanın müxalifət partiyalarının rəhbərləri arasında gizli görüş keçirilib.

AzVision.az-ın əldə etdiyi məlumata görə, Vətəndaş Həmrəyliyi Partiyasının (VHP)sədri, sabiq deputat Sabir Rüstəmxanlının təşəbbüsü ilə baş tutan görüşdə ölkədəki ictimai-siyasi vəziyyət, müxalifət partiyalarının yenidən birlik formasında fəaliyyət göstərməsi müzakirə olunub.

Bağlı qapılar arxasında bir neçə saat davam edən görüş barədə mətbuata informasiya sızdırılmayıb. Hətta görüşdən fotonun paylaşılması da qadağan edilib.

Toplantıda iştirak edən Azərbaycan Demokrat Partiyasının sədri Sərdar Cəlaloğlu belə bir görüşün keçirildiyini AzVision.az-a təsdiqləyib.

Partiya sədri bildirib ki, görüş iyul ayının əvvəlində baş tutub: “Görüş Dünya Azərbaycanlıları Konqresinin təşəbbüsü ilə keçirilib. Məqsəd Dağlıq Qarabağ münaqişəsi ilə bağlı müxalif siyasi partiyaların ortaq mövqeyinin müəyyənləşdirilməsi idi. Eyni zamanda görüşdə partiyalararası funksional əməkdaşlıq, müxalif siyasi partiyalar arasındankı küsülülüyü aradan götürmək, müəyyən birlik yaradılması cəhdləri müzakirə olunub. Ümumiyyətlə, görüşdüə müzakirələt bir neçə saat davam edib”.

S.Cəlaloğlu vurğulayıb ki, görüşdə müxalifət partiyalarının birlik formatında fəaliyyət göstərməsi ilə bağlı razılıq əldə olunmayıb: “Görüşdə belə bir razılığa gəlindi ki, müxalifət partiyaları hələlik funksional əməkdaşlıq etsinlər. Ölkənin, xalqın, dövlətin həyatı ilə bağlı ciddi məsələlər olanda istənilən partiya təşəbbüs qaldırsın. Görüşdə iştirak edən partiyalar bildirdilər ki, həmin təşəbbüsdə aktiv iştirak edəcəklər. Amma, hələlik müxalifət partiyaları arasında daimi birlik yaradılması barədə razılıq əldə olunmayıb. Hazırda ölkədə müxalifətçilik böhran içərisindədir. Belə bir vəziyyətdə müxalifətin birlik formatında fəaliyyəti mümkün deyil”.

Müxalix partiya sədri qeyd edib ki, görüşdə 12 müxalifət partiyasının sədri iştirak edib: “Görüşdə Vətəndaş Həmrəyliyi Partiyasının sədri Sabir Rüstəmxanlı, Vətəndaş və İnkişaf Partiyasının sədri Əli Əliyev, Müsavat Partiyasının sədri Arif Hacılı, Azərbaycan Xalq Cəbhəsi Partiyasının sədri Əli Kərimli, Klassik Xalq Cəbhəsi Partiyasının sədri Mirmahmud Mirəlioğlu, Xalq Partiyasının sədri Pənah Hüseyn, Azad Azərbaycan Partiyasının sədri Kamil Seyidov, Böyük Azərbaycan Partiyasının sədri Elşad Musayev, Açıq Cəmiyyət Partiyasının sədri Sülhəddin Əkbər, İsa Qəmbər iştirak edib. Milli Şuranın sədri Cəmil Həsənli və dəvət olunan digər partiya sədrləri obyektiv səbəbdən görüşdə iştirak edə bilməyiblər”.

Görüşün gizli keçirilməsinə gəlincə, partiya sədri bildirib ki, bununla bağlı məlumat yayılması barədə razılıq əldə olub: “Vətəndaş Həmrəyliyi Partiyasının sədri Sabir Rüstəmxanlı görüş barədə məlumat yaymalı idi”.

Həmçinin oxuyun

Başı yarılan uşağa yardım etməyən həkimlərlə bağlı qərar verildi

Jurnalist Məhərrəm Əliyev bir neçə gün öncə qardaşı oğlunun başından xəsarət aldığını, lakin xəstəxanaların heç …

Bir cavab yazın