ATƏT daxilində konsensusun olmaması səbəbindən indiyə kimi Qarabağda insidentlərin araşdırılması mexanizminin tətbiqi və regionda müşahidəçilərin sayının artırılması təkliflərilə bağlı məsələlər həllini tapmayıb.
Bu sözləri Rusiya xarici işlər naziri Sergey Lavrov ötən ilin yekunlarına həsr olunmuş mətbuat konfransında deyib. Azərbaycan və Ermənistanın qarşılıqlı ittihamları nəzərə alınaraq, ATƏT-in sözügedən mexanizmlərin tətbiqi təklifini 2016-cı ildə münaqişənin həlli yolunda irəliyə doğru addım kimi dəyərləndirən Rusiya xarici siyasət idarəsinin rəhbəri bunun təklif olaraq kağız üzərində qalmasını “xoşagəlməz” adlandırıb. Rusiyalı nazir təəssüflə qeyd edib ki, əslində bu mexanizmlərin tezliklə tətbiqini gözləmir, çünki ATƏT daxilində konsensus mövcud deyil. Konsensusun yoxluğu səbəbini isə o, təşkilatın özündən soruşmağı jurnalistlərə tövsiyə edib: “2011-ci ildə də insidentlərin araşdırılması məsələsi Həştərxan görüşündə müzakirə edilmişdi. Bu tədbirlər çox vacibdir. İnsidentlərin araşdırılması və ATƏT müşahidəçilərinin sayının artırılmasına dair razılıq ona görə reallaşa bilmir ki, bununla bağlı ATƏT-də konsensus yoxdur. Bunu təşkilatın üzvlərindən də maraqlanmaq olar”.
Maraqlıdır, politoloqlar Lavrovun bu yanaşmasını necə dəyərləndirir?
Sözügedən məsələ ilə bağlı fikirlərini “Bakı-Xəbər”lə bölüşən millət vəkili, politoloq Aydın Mirzəzadə buna birmənalı prizmadan yanaşmadı: “Bundansa, yaxşı olardı ki, həmsədrlər Dağlıq Qarabağ probleminin nədən yarandığı barədə bir ümumi rəyə gələydilər. Ayrı-ayrı ikinci, üçüncü dərəcəli məsələlər gündəmdə qalsa da, müzakirə edilsə də, problemin kökündə Ermənistanın Azərbaycan ərazilərinin bir hissəsini işğal etməsi dayanır. Eyni zamanda, Azərbaycanın ərazi bütövlüyünü tanımaması dayanır. Çox təəssüflər olsun ki, buna heç bir fikir bildirmirlər. Həmçinin, heç kim Ermənistandan Azərbaycan torpaqlarından qoşunlarını çıxarmağı tələb etmir. Bu kimi presedentlər digər dövlətlərdə baş verdikdə, ani reaksiya verilir. Ermənistana qarşı isə hər hansı bir sanksiya tətbiq edilməsi müzakirə mövzusu deyil. Ermənistan və Azərbaycan tərəzinin bir gözünə qoyulur. Hesab edirəm ki, nə qədər ki, Ermənistanın hərəkətinə hüquqi qiymət verilməyib, Dağlıq Qarabağ probleminin həllində bir o qədər problemlər yaşanacaq”.
Vidadi ORDAHALLI
Ana səhifə / Sosial / Aydın Mirzəzadə: “Yaxşı olardı ki, həmsədrlər Dağlıq Qarabağ probleminin nədən yarandığı barədə bir ümumi rəyə gələydilər”
Həmçinin oxuyun
Təhsil Nazirliyi tender keçirmədən 2 milyonu Ramiz Mehdiyevin oğlunun şirkətinə verdi
Elm və Təhsil Nazirliyi “Şərq-Qərb” ASC (VÖEN – 2000043631) ilə 1 milyon 996 min 500 …