ATV telekanalı müxalifət telekanalı ilə sövdələşməyə gedib? – QALMAQAL

Dünən axşam saatlarında yerli mediada bir video yayınlanıb.

Musavat.com xəbər verir ki, həmin videonun tanınmış tele-jurnalist Xoşqədəm Baxşəliyevanın peşəkar karyerasına zərbə vurmaq və onu ictimai rəydə gözdən salmaq məqsədi ilə ATV kanalı tərəfindən Meydan.tv saytına sızdırıldığı kimsədə şübhə doğurmur. Məsələnin maraqlı tərəfi budur ki, məhz X. Hidayətqızına zərər yetirmək üçün iqtidar komandasına xidmət edən televiziya bu “layihədə” mövcud hakimiyyətə ən sərt mövqe daşıyan bir KİV-lə əməkdaşlığa girib.

Sayt xatırladır ki, Xoşqədəm Hidayətqızı ATV-ni tərk etdikdən sonra veriliş ətrafında qalmaqal yaşanmışdı. Video parçadan aydın olur ki, həmin görüntülər ATV kanalında yayımlanan “Səni axtarıram” proqramının çəkilişlərindən götürülüb. Kadrlarda səhnə arxasında baş verənlər əks olunub. Həmin kadrlar layihə müəlliflərinin reytinq naminə seyrçiləri aldatdıqlarına, saxtakarlıq etdiklərinə həsr olunub. Sayt qeyd edir ki, bu kadrlar və ATV-nin mətbəxi bu teleşirkətin rəhbərliyinə çoxdan məlum idi. Odur ki, onu indi ortaya çıxarmaqlarında yeganə məqsəd X. Hidayətqızının ATV-dən ayrıldıqdan sonra fərqli adla da olsa, eyni konsepsiyalı verilişləri başqa televiziyalarda daha yüksək reytinqə qaldırmasıdır. ATV isə, kimi gətirsə də, bu cür layihələri heç cür tutdura bilməyib.