ABŞ istisna olmaqla, G20 sammitinin bütün iştirakçıları iqlim dəyişikliyi ilə bağlı öhdəliklərə sadiq olduqlarını təsdiqləyib. Hamburqda qəbul edilən bəyannamə ABŞ-ın iqlim dəyişikliyinə dair Paris sazişindən çıxdığını qeyd edir.
ABŞ prezidenti Donald Tramp razılaşmadan çıxdığını ötən ay elan etmişdi.
Cümə və şənbə günü keçirilən danışıqlarda ABŞ-la digər ölkələrin mövqeləri arasındakı fərqi aradan qaldırmaq mümkün olmayıb. Almaniya kansleri Angela Merkel danışıqların “çox çətin” keçdiyini bildirib.
Nümayəndə heyətləri yekun bəyannamədə əks olunacaq ifadələri razılaşdırmaq üçün səhərədək işlərini davam etdirib.
G20-nin (İyirmilər Qrupu) zirvə görüşü 19 ölkə və Aİ-ni bir araya gətirir.
Almaniyanın Hamburq şəhərində yer alan dünya liderlərinin forumu etirazlar fonunda keçib. Nümayişçilər Donald Trampla Vladimir Putinin sammitə qatılmasına və sosial ədalətsizliyə etiraz edib. Onlar, həmçinin, iqlim dəyişməsinə diqqət yetirməyə çağırıb.
Qeyd edək ki, Türkiyə ABŞ-ın qərarı səbəbindən iqlim üzrə Paris sazişini hələ ki, ratifikasiya etməyəcək. Bunu G20 sammiti zamanı Türkiyə prezidenti Rəcəb Tayyib Ərdoğan bildirib.
ABŞ-ın iqlim dəyişikliyinə dair Paris sazişindən çıxması səbəbini nə ilə izah etmək olar?
Vətəndaş və İnkişaf Partiyasının sədri Əli Əliyev “Bakı-Xəbər”ə açıqlamasında bildirdi ki, deyilən sənədə yalnız ekoloji aspektdən baxmaq lazım deyil:
“Zahirən ekoloji sənəd kimi görünsə də, Paris sazişi özündə böyük iqtisadi məhrumiyyətləri cəmləyir. Buna həm də siyasi sənəd demək olar. Çünki siyasəti iqtisadiyyatsız təsəvvür etmək mümkün deyil. Trampın bu sənəddən imtina edəcəyi gözlənilən idi. Çünki seçki kampaniyasında ABŞ iqtisadiyyatını dirçəldəcəyilə bağlı böyük vədlər verən Tramp Paris sənədində nəzərdə tutulan müddəaları qəbul edə bilməzdi. Onda o, nəzərdə tutulan hədəflərə çatmamış olar. Xüsusilə də sənəddə ABŞ-da güclü inkişaf edən metalurgiya sənayesi istiqamətində müəyyən qadağaların tətbiqi nəzərdə tutulur. Tramp G-20 sammitində Obama administrasiyasının iqtisadi siyasətindən imtina etdiyini ortaya qoymuş oldu. Çünki bundan əvvəlki sazişdə dünyanın iri istehsalçıları olan Çin və ABŞ Paris sənədinə imza atıb. Çox güman ki, Çin də sənədi ratifikasiya etməmək zorunda qalacaq. Çünki ABŞ-la rəqabətdə olan həmin ölkə istehsalda geri qala bilər. Almaniya və Fransa sammitdən əvvəl ABŞ-a ultimativ bir bəyanat ünvanlayıb bildirirdilər ki, Trampın sənədi imzalamayacağı təqdirdə Aİ ilə ABŞ-ın münasibətlərində sərinlik yarana bilər. Ancaq, görünür, Tramp ABŞ iqtisadiyyatını dirçəltməyi daha məqsədəuyğun sayıb ki, ölkəsinin gücünü daha da artıra bilsin. Düşünürəm ki, ABŞ-ın imtinası sənədlə bağlı müzakirələri açıq saxlamış olacaq və yəqin ki, bir çox ölkə imtina edəcək. Artıq Türkiyə də sənədlə bağlı mövqeyini ABŞ-ın atdığı addımla izah etdi”.
Məhəmmədəli QƏRİBLİ