Azinforum.az İnformasiya Portalı Onlayn Xəbər Portalı
Hazırda Bakı Şəhər İcra Hakimiyyətinin binasında icra başçısı Hacıbala Abutalıbov Binəqədi rayonunda yanan binanın sakinlərini qəbul edir.
“Qafqazinfo“nun əməkdaşının verdiyi məlumata görə, iclasda Bakı meri ilə yanaşı Binəqədi icra başçısı Xaləddin İsgəndərov da iştirak edir.
***
Yanan binada həyatını itirən 2 yaşlı Ayxanın nənəsi hadisə baş verən binaya qayıtmaq istəmədiklərini bildirib:
“Biz o evdə necə yaşaya bilərik? Mən dünən evə girib divarları öpmüşəm. Hər yerdə Ayxanı görürəm, hiss edirəm. Biz bundan sonra o evlərdə necə yaşayaq?!”
***
Daha sonra mer sakinlərin diqqətinə çatdırıb ki, ASAN xidmətdən sənədləri əldə edəndən sonra bankdan onlara ayrılmış pulu çıxara biləcəklər: “Ailədə pulun kimin götürəcəyinə özünüz qərar verin. Həmin adam da pulu götürsün. Sonra mənə deməyin ki, pulu bacım aldı, ondan al ver mənə. Mən onu edə bilməyəcəm”.
Yanan binada kirayə qalan bir kişi isə qeyd edib ki, geyinməyə paltarları yoxdur: “Biz əynimizə paltar tapmırıq ki, geyinək. Qonşunun paltarını geyinmişik. Bizə bunun üçün maddi yardım edilsin”.
Mer isə sakinlərin nəzərinə çatdırıb ki, paltar və yemək üçün əlavə min manat veriləcək.
Abutalıbov bir daha binada kirayədə qalanların taleyinə toxunub: “Kirayədə yaşayanlar ev sahibi ilə müqavilə imzalasın, gətirib bizə təqdim etsin. Biz də onun kirayə pulunu dövlət hesabına ödəyək”.
***
Sakinlər merə etiraz edərək o evdə yaşamaq istəmədiklərini bir daha bəyan ediblər: “Biz o binada yaşamaq istəmirik. Heç birimiz o mənzilləri istəmirik”.
Mer isə sakinlərin etirazına belə cavab verib: “Kim evində yaşamaq istəmrisə, getsin Hüquq Mühafizə Orqanlarına müraciət etsin. Mənə tapşırılıb ki, binanı təmir edim. Mən də binanı sona kimi təmir edəcəyəm. Siz elə bilməyin ki, məmurların hamısı zir-zibildir. Mən binanı təmir edirəm. Sabah bir şey olsa, məsuliyyət mənim olacaq. Sizdən çox mən qorxuram. Mənim də övladım var. Təmirdən sorna bir-bir otaqları yoxlayacağam. Binada indiyə kimi qaz olmayıb, təmir zamanı qaz da çəkiləcək”.
