Cümə axşamı , Mart 28 2024
Ana səhifə / Siyasət / Mikayıl Cabbarov Misir Mərdanovu “güllə qabağına” verir – “2” davası…

Mikayıl Cabbarov Misir Mərdanovu “güllə qabağına” verir – “2” davası…

Təhsil Nazirliyi buraxılış imtahanında şagirdlərin IX və XI sinifdə buraxılış imtahanında “2” qiymət almalarının maraqlı səbəbini açıqlayıb.
Təhsil Nazirliyindən verilən xəbərə görə, son 3 ildə Azərbaycanda 20 mindən çox şagird milli qiymətləndirimədə iştirak edib. Araşdırmalar nəticəsində aydın olub ki, şagirdlərin IX sinifdə buraxılış imtahanında “qeyri-kafi” qiymət almalarının əsas səbəbi onların, əslində, ibtidai sinifdə, yəni, 4-cü sinifdə zəif nəticə göstərmələridir. Yuxarı sinifdə zəif nəticə göstərən şagirdlər ibtidai sinfi yaxşı mənimsəmədiklərindən yuxarı siniflərdəki məzmunu da qavramaqda çətinlik çəkirlər.
Mikayıl Cabbarovun nazirliyinin bu açıqlamasını maraqlı edən isə əslində orada təkcə bu il buraxılış imtahanlarında 36 mindən artıq şağirdin “2” qiymət almasının məsuliyyətindən imtina cəhdidir. Məsələ burasındadır ki, nazirlik həmin şagirdlərin ibtidai sinifdə zəif nəticə göstərmələrini əsas gətirməklə problemin kökünün ən azı 5-7 il əvvələ gedib çıxdığına işarə edir. Beləliklə də dolayı yolla da olsa, məsuliyyət həmin dövrün təhsil naziri Misir Mərdanovun üzərinə qoyulur.
Düzü, Mərdanovun vaxtında ölkədə ali və orta təhsilin ciddi problemlər bataqlığında çapaladığını qeyd etmək artıqdır. Amma əksər müstəqil ekspertlər və sıravi vətəndaşlar Cabbarovun təhsil sisteminin başına keçdiyi dövrdən bu yana həmin problemlərin həlli istiqamətində təsirli addımlar atılmadığı qənaətindədirlər. Yəni əslində təhsil sektorunda yaxşılığa doğru dəyişəb heç nə yoxdur, əksinə, bu sahədə vəziyyət daha da ağırlaşıb.
Belədə Təhsil Nazirliyinin on minlərlə şagirdin buraxılış imtahanlarında “2” almasının kökünü əvvəlki illərdə axtarmağa çalışaraq, özünü məsuliyyətdən azad etməyə çalışması qeyri-ciddilikdir və ən azından acı təbəssüm doğurur.
Təhsil Nazirliyinin və onun tabeliyindəki müəssisələrin vəzifəsi həm də ibtidai sinifdə zəif göstəricilərə malik şagirdlərin sonrakı mərhələlərdə yaxşı nəticələrə nail olmasını təmin etməkdir. Əks halda ölkədə icbari təhsilə 4-cü sinifdən sonra nə hacət var? Qoy kim ibtidai sinifdə əla və yaxşı göstəricilərə nail olub, təhsilini davam elətdirsin, göstəricisi zəif olanlar isə məktəbdən kənarlaşdırılsın, onlar üçün nə valideynlər, nə də dövlət artıq xərc çəkməsin.
Ümumiyyətlə isə, bir halda ki, indiki təhsil sistemi belə şagirdlərin sonradan uğur qazanmasını təmin etmək gücündə deyil, onda Mikayıl Cabbarov və komandası nə işlə məşğuldurlar? Əlbəttə, əgər bunu soruşmaq ayıb deyilsə…(Qaynarinfo.Az)

Həmçinin oxuyun

Bakı və Kreml Brüssel görüşündən narahatdır, ABŞ tənqidləri qəbul etmir

Vaşinqton Bakının aprelin 5-də Brüsseldə ABŞ, Avropa İttifaqı və Ermənistanın üçtərəfli görüşü ilə bağlı tənqidini …

Bir cavab yazın