İrandan daha bir təxribat: Mədəniyyət TV-dəki proqramı kəsib…– Video

Dünən İran mətbuatı Mədəniyyət TV-də yayımlanan konsert proqramının 28 saniyədən ibarət hissəsini kəsib yayaraq Azərbaycana qarşı informasiya təxribatı həyata keçirib.

Sosial şəbəkələrdə gündəm olan həmin görüntüləri İran mətbuatı məğzindən kənar formada təqdim etməyə çalşıb.
Məsələ ilə bağlı “Azərbaycan Televiziya və Radio Verilişləri” QSC açıqlama yayıb.
Həmin açıqlamanı təqdim edirik:
“Bu gün İran dövlətinin Azərbaycana qarşı siyasəti və qərəzli mövqeyi media müstəvisində də davam edir. “İranlı həmkarlarımız” bu yolda jurnalist adına və etikasına yaraşmayan bütün metodlara əl atır. Təhqirdən tutmuş, dezinformasiyaya qədər… Növbəti addım isə “Mədəniyyət” kanalında yayımlanan və Mikayıl Müşfiqin faciəvi taleyinə həsr olunmuş “Müşfiq ağıları” adlı oratoriyadan bir hissəni kəsib paylaşmaq oldu. Həmin hissədə Sovet Sosialist Respublikaları İttifaqı dönəmində rejimin Azərbaycanda din əleyhinə təbliğatı, İslam dini ilə mübarizəsi yer alır. İran mediası məhz 28 saniyədən ibarət həmin hissəni kəsərək Azərbaycanı İslam dininə, məscidlərə, azana qarşı mübarizə aparmaqda ittiham edir. Bu ittiham həm gülməli, həm də ağlamalıdır. Əvvəla, müsəlmanlara qarşı soyqırımı, terror siyasəti həyata keçirən Ermənistanı Quran ayələri ilə qarşılayan, məscidlərin darmadağın edilməsinə, orada donuz saxlanılmasına bir dəfə də olsa, səsini çıxarmayan, bu gün də xalqına, xüsudən də Cənubi azərbaycanlılara qarşı repressiyalara ara verməyən İran dövlətinin kimisə, o cümlədən də Azərbaycanı İslam dininə xəyanətdə ittiham etməyə haqqı varmı?
Ermənipərəst İran rejimini başa düşdük, məsələnin ən acınacaqlı tərəfi odur ki, daxildəki bəzi İranyönümlü dairələr də fars rejiminin dezinformasiya siyasətinə dəstək verir, araşdırma aparmamış Mədəniyyət TV-yə hücuma keçirlər. Odur ki, məsələnin mahiyyətini bir daha izah edirik:
2022-ci ilin 14 oktyabr tarixində Bakıdakı Dövlət Akademik Filarmoniyasında Əməkdar incəsənət xadimi, bəstəkar Cavanşir Quliyevin yaradıcılıq gecəsi keçirilib. Konsert Mədəniyyət Nazirliyi və Azərbaycan Dövlət Akademik Filarmoniyası tərəfindən təşkil olunub.
Musiqili gecədə repressiya qurbanı olan şair Mikayıl Müşfiqin faciəvi taleyinə həsr olunmuş “Müşfiq ağıları” adlı oratoriya ilk dəfə təqdim olunub. Librettosunun müəllifi Xalq şairi Sabir Rüstəmxanlının olduğu əsərin dirijoru Mustafa Mehmandarov olub. Əsəri Ü.Hacıbəyli adına Azərbaycan Dövlət Simfonik Orkestri və bədii rəhbəri Gülbacı İmanova olan Azərbaycan Dövlət Xor Kapellası ifa edib, əsərin ideoloji xətti SSRİ-nin İslam dininə qarşı mübarizəsi, Azərbaycan ziyalılarını da əsasən din pərdəsi altında repressiyaya məruz qoymasıdır.
“Müşfiq ağıları” adlı oratoriyadan məhz həmin hissəni – 28 saniyəlik parçanı çıxarıb yaymaq isə ictimaiyyəti çaşdırmaqdan başqa bir şey deyil”.
Əsərin ümumi məzmunu ilə bağlı həmin oratoriyanın tam variantını təqdim edirik: