Ana səhifə / Siyasət / Etibarnamə ilə maşın sürənlərə şad xəbər

Etibarnamə ilə maşın sürənlərə şad xəbər

Avtomobili yalnız idarə etmək səlahiyyətini ehtiva edən etibarnamə ilə…
Son illər yalnız sürmək üçün etibarnaməsi olan şəxsin özü avtomobildə olmaqla həmin avtomobili sürmək üçün başqasına verə bilməsinə dair məsələ dəfələrlə müzakirə edilib. Hüquqşünas Ərşad Hüseynov qanunvericiliyə istinadən qeyd edirdi ki, avtomobili yalnız idarə etmək səlahiyyətini ehtiva edən etibarnamə ilə əldə etmiş şəxsin özü həmin avtomobildə olmaqla bu avtomobili müvafiq sürücülük vəsiqəsi olan və sərxoş olmayan istənilən başqa şəxsin idarə etməsi tam olaraq yol hərəkəti qaydalarına uyğundur və heç bir hüquqi məsuliyyət yarada bilməz.

Hüquqşunas bununla bağlı ölkəmizdə formalaşmış yanlış təcrübənin, yəni belə halda avtomobili idarə edən şəxsin İnzibati Xətalar Məcəlləsinin 152.1-ci maddəsi üzrə məsuliyyətə cəlb edilməsinin aradan qaldırılmasının da vacibliyini vurğulayırdı.
Saytımızın sadiq və fəal oxucularından biri olan Təbriz Yusubovun bizə təqdim etdiyi rəsmi sənədə diqqət etdikdə bu mövzuda hüquqi polemikaya son qoyulduğu qənaətinə gəlmək olar. Təbriz bəyin sorğusuna əsasən DİN Baş Dövlət Yol Polisi İdarəsindən verilmiş cavabda birmənalı olaraq göstərilir ki, yalnız sürmək üçün etibarnaməsi olan şəxsin özü avtomobildə olmaqla həmin avtomobili digər sürücünün idarə etməsi İXM-in 152.1-ci maddəsi üzrə məsuliyyətə səbəb ola bilməz. Bu məsələ ilə bağlı fəal vətəndaş mövqeyi nümayiş etdirdiyinə görə Təbriz bəyə, habelə hüquqauyğun fikir bildirildiyinə görə BDYPİ-nin rəhbərliyinə minnətdarlığımızı bildiririk.
Bununla belə, hüquqşünas Ərşad Hüseynov avtomobilinin ümumi (KASKO) sığortası olan şəxslərin nəzərinə çatdırır ki, bu qaydada öz avtomobillərini başqa şəxsin idarə etməsinə verərkən problem yarana bilər. Çünki avtomobili müvəqqəti də olsa başqasının idarə etməsinə vermə ümumi sığorta müqaviləsinin şərtlərini pozmaqla müvafiq sığorta hadisəsi baş verdikdə sığortaçının sığorta ödənişindən imtina etməsinə gətirib çıxara bilər. Lakin avtomobili bu qaydada başqa sürücüyə vermə mülki məsuliyyətin icbari sığortası ilə bağlı hər hansı problem yarada bilməz, çünki belə qaydada avtomobilin idarə edilməsinin başqasına verilməsi qanunazidd deyil.

Həmçinin oxuyun

Bakı və Kreml Brüssel görüşündən narahatdır, ABŞ tənqidləri qəbul etmir

Vaşinqton Bakının aprelin 5-də Brüsseldə ABŞ, Avropa İttifaqı və Ermənistanın üçtərəfli görüşü ilə bağlı tənqidini …

Bir cavab yazın