“Yalnız bu parametrlər deyil, digər fərqli sahələrdə də Azərbaycan MDB ölkələri arasında öndə gedir”
Mehman Muradlı: “Bu, eyni zamanda, beynəlxalq qurumların Azərbaycana göstərdiyi marağın və qarşılıqlı hörmətin əlaməti sayıla bilər”
Bu günlərdə MDB ölkələri ilə bağlı yayılan iki məlumat xüsusilə diqqəti cəlb etdi. Həmin məlumatlardan birində bildirilirdi ki, Qazaxıstan BMT Təhlükəsizlik Şurasının qeyri-daimi üzvü kimi fəaliyyətə başlayıb.
Qazaxıstan 2017-2018-ci illərdə BMT Təhlükəsizlik Şurasının qeyri-daimi üzvü olacaq. Artıq BMT Təhlükəsizlik Şurasında Qazaxıstanın bayrağı asılıb, Təhlükəsizlik Şurasının zalındakı stola “Qazaxıstan” lövhəsi qoyulub. Bununla da Qazaxıstan Mərkəzi Asiya ölkələri sırasında BMT Təhlükəsizlik Şurasının qeyri-daimi üzvü olan ilk ölkə olub.
Qeyd edək ki, Qazaxıstan BMT Baş Assambleyasının 28 iyun 2016-cı il tarixdə keçirilən iclasında BMT Təhlükəsizlik Şurasının 2017-2018-ci illər üçün qeyri-daimi üzvü seçilib.
Digər məlumatda isə bildirilirdi ki, Türkmənistanda insan haqları üzrə müvəkillik funksiyasını həyata keçirən Ombudsman institutu fəaliyyətə başlayıb.
Bu ölkələrlə müqayisədə Azərbaycanın qeyd olunan istiqamətlərdə onları qabaqlaması ölkəmizin uğurlu inkişafının göstəricisidir.
Hüquqşünas Mehman Muradlı qəzetimizə açıqlamasında bildirdi ki, Azərbaycan üzərinə düşən beynəlxalq öhdəlikləri layiqincə yerinə yetirən ölkələrdəndir:
“Bunu konkret faktlara əsaslanaraq deyə bilərik. Bu yaxınlarda Avropa İnsan Haqları Məhkəməsinin sədri mediaya açıqlamasında bildirdi ki, Azərbaycan üzərinə düşən öhdəlikləri layiqincə yerinə yetirir. Hətta bu vəziyyəti digər ölkələrə örnək kimi də göstərdi. Ombudsman institutu da ölkəmizdə MDB respublikaları arasında ilk yaranıb. 2001-ci ildən bu təsisat fəaliyyətdədir.
Qazaxıstan kifayət qədər böyük və zəngin ölkələr sırasına aiddir, ancaq göründüyü kimi, onlar indi BMT Təhlükəsizlik Şurasının qeyri-daimi üzvü seçilə bilib. Müqayisə üçün deyim ki, Azərbaycan nəinki həmin qurumun qeyri-daimi üzvü olub, hətta ora sədrlik də edib. Bütün bunlar ölkəmizdə insan haqlarının lazımi şəkildə qorunduğuna və diplomatiyamızın yaxşı fəaliyyət göstərdiyinə sübut sayıla bilər. Yalnız bu parametrlər deyil, digər fərqli sahələrdə də Azərbaycan MDB ölkələri arasında öndə gedir. Bu, eyni zamanda, beynəlxalq qurumların Azərbaycana göstərdiyi marağın və qarşılıqlı hörmətin əlaməti sayıla bilər”.
Məhəmmədəli QƏRİBLİ