SIĞORTA NƏZARƏTİ XİDMƏTİ “ATƏŞGAH”ı HİMAYƏ EDİR!? – Prezidentə məktub

02 Aprel 2016

Azərbaycanda sığorta şirkətlərinin fəaliyyətində qanunsuzluqlar, müştərilərin aldadılması faktları kifayət qədər çox olsa da, bununla bağlı müvafiq tədbirlər görülmür. Maliyyə Nazirliyinin Dövlət Sığorta Nəzarəti Xidməti əksər hallarda bu şikayətləri görməzdən gələrək, sığorta şirkətlərini himayə edir. Bunu təmənnalı edib-etmədiyini söyləmək çətindir. Ancaq Azərbaycanda sığorta şirkətlərinin arxasında iri oliqarxların dayandığı hər kəsə məlumdur. Dövlət Sığorta Nəzarəti Xidməti də, şikayətlərə laqeyd münasibət göstərməklə, bir növ onların maraqlarını qorumuş olur. Təsadüfi deyil ki, Prezident İlham Əliyevin vətəndaşların qanuni maraqlarını qorumaq, şikayətlərə operativ və ədalətlə yanaşmaq barədə tələbləri də, bir çox hallarda təsirsiz qalır. Məmurlar öz bildiklərini etməkdə, vətəndaşları incitməkdə və onların şikayətlərini qulaqardına vurmaqda davam edirlər.

Elə Bakı şəhəri Sabunçu rayonu, Bakıxanov qəsəbəsində yaşayan Məmmədəliyeva Esmira Səhrəd qızı da onun şikayətinə Maliyyə Nazirliyinin Dövlət Sığorta Nəzarəti Xidməti tərəfindən laqeyd yanaşılmasından şikayətlənir.

Qeyd edək ki, Esmira Məmmədəliyevanın şikayəti “Atəşgah” Sığorta Şirkətindəndir. O, təxminən 3 aydır ki, “Atəşgah” Sığorta Şirkətindən qanuni sığortasını ala bilmir. Bununla bağlı Esmira Məmmədəliyevanın “AzPolitika”da yayımlanan şikayət məktubundaətraflı məlumat verilib.

Ancaq Dövlət Sığorta Nəzarəti Xidməti heç bir tədbir görmədiyindən, Esmira Məmmədəliyeva Prezident İlham Əliyevə də müraciət etmək məcburiyyətində qalıb. Bir nüsxəsi “AzPolitika.info”-ya daxil olan müraciətdə bildirilir:

“Hörmətli Prezident!
Bildirirəm ki, Cəfərov İsmayıl Əkrəm oğlunun idarə etdiyi, 2013-cü il buraxılış olan Mitsubishi L200 markalı 10 YY 588 dövlət qeydiyyat nişanlı avtomobil idarəetməni itirməsi səbəbindən mənə məxsus 2013-cü il buraxılış olan Lexus RX 350 markalı, 90 ZZ 588 dövlət qeydiyyat nişanlı avtomobilə dəymişdir. Nəticədə mənə məxsus avtomobilin sol tərəf ön və arxa qapıları əzilmiş və avtomobilimə ciddi ziyan dəymişdir. Cəfərov İsmayıl Əkrəm oğlunun idarə etdiyi avtomobil “Atəşgah” Sığorta şirkətində 06.08.2015-ci il tarixdə icbari sığortalanmış və AD 601938 saylı sığorta şəhadətnaməsi 05.08.2016-cı ilədək qüvvədədir.

“Lexus” MMC tərəfindən 05.12.2015-ci il tarixdə 0315 saylı Qüsur aktı tərtib olunmuş və texniki baxış zamanı zərər 1764.10 AZN müəyyən edilmişdir. “Atəşgah” Sığorta şirkətinin əməkdaşları bu Qüsur aktı ilə razılaşmadığından, təkrarən bir neçə yerdə də Qüsur aktı tərtib edilmiş və hər bir aktda mənə məxsus avtomobilin ehtiyyat hissələrinin dəyişdirilməsinin zəruri olduğu müəyyən edilmişir. Lakin “Atəşgah” Sığorta şirkəti qanunun tələblərini pozaraq, Qüsur aktında müəyyən edilmiş sığorta ödənişini ödəməkdən imtina edir.

Cənab Prezident, “Atəşgah” Sığorta şirkətinin əməkdaşlarının qanunsuz hərəkətləri barədə Sizə 09.12.2015-ci il tarixdə ərizə ilə müraciət etmişdim. Müraciətim həmin vaxt aidiyyatı üzrə tədbir görülməsi üçün Azərbaycan Respublikası Maliyyə Nazirliyinin Dövlət Sığorta Nəzarəti Xidmətinə göndərilsə də, Nazirlik tərəfindən heç bir tədbir görülmədi. Hətta müraciətimə rəsmi cavab da yazılmadı. Sığorta haqqında qanunun tələblərinə əsasən, maşınını və ya əmlakını sığortaladan insanlar hadisə baş verərkən itirdiklərini müqavilədə nəzərdə tutulmuş qaydada, məbləğdə almalıdır. “Atəşgah” Sığorta şirkəti isə üzərinə düşən vəzifəni yerinə yetirmir və qanunvericiliyin tələblərini pozur. Dövlət orqanları isə belə Sığorta şirkətləri barəsində heç bir ölçü götürmür və heç bir tədbir görmürlər. Nəticədə isə vətəndaşın hüquqları pozulur və Sığorta şirkətləri tərəfindən süründürməçilik hallarının artması baş verir.

Hörmətli Prezident, müraciətimin tam araşdırılması və yol-nəqliyyat hadisəsi zamanı avtomobilimə dəymış zərərin “Lexus” MMC tərəfindən tərtib edilmiş 05.12.2015-ci il tarixli 0315 saylı Qüsur aktına əsasən, ödənilməsinə göstəriş verməyinizi xahiş edirəm.
Əvvəlcədən öz minnətdarlığımı bildirirəm”.

Esmira Məmmədəliyeva məktubuna “Lexus Bakı” MMC-nin, Toyota Bakı Mərkəzinin,“ŞƏRQMOTORS” MMC-nin və “İnter Kontinental” avtomobillərə texniki xidmət stansiyasının tərtib etdiyi Qüsur Aktlarını da əlavə edib. Onların fotosurətləri aşağıda verilib.