Cümə , Yanvar 21 2022
Ana səhifə / Siyasət / “Sənin kimilərin səfeh ssenariləri ilə bu dövlətin yürüməsi…”

“Sənin kimilərin səfeh ssenariləri ilə bu dövlətin yürüməsi…”

Siyasətlə məşğul olmaq maarifçilik çalışmalarının yanında elə də ağır deyil. Siyasətdə qarşında əsasən siyasi opponentlərin durur. Onlarla danışmanın, mübahisənin öz dili, öz üslubu var. 

Maarifçilikdə isə böyük bir danabaş güruhu ilə savaşda ömrünü-gününü çürütməli olacaqsan. Qaydası, üslubu yox, tipik bir küçə savaşı kimi bir şey. Bizim işimizin ağır tərəfi budur ki, həmin güruh yalnız ölkəmizin içində böhtanları, yalanları ilə canımızı təngə gətirmirlər. 

Bu xalqı nağıllar dünyasından ayırıb real dünyanın içinə səsləməyə başladığında Rusiyadan, İrandan boy verib düşüncələrimizi söyləməyə əngəl yaradanlar da az deyil. Ancaq ən acınacaqlısı canımız Türkiyədən böhtanlar yağdıran danabaşlardır. 

Yenə də bunlar PKK ünsürlər, yaxud da orada yaşayan erməni təəssübkeşləri olsa, anlayışla yanaşmaq mümkündür. Bunların əksəriyyəti özünə milliyətçi, elçibəyçi deyən, son otuz ildə bir arpa boyu ağıllanmayan məxluqlardır. Onların sırasında biri daha qabarıq seçilir. Bu, əvvəllər Türkiyənin Azərbaycan səfirliyində mədəniyyət ataşşesi işləmiş Turqut Ər adlı danabaşdır. 

İllər öncə Azərbaycana aid cəfəngiyyatla dolu bir kitab da yazmışdı -“Azadlıqdan tiranlığa”. Azərbaycan hakimiyyətinə düşməndir, Azərbaycanın Türkiyədən başqa kimsə ilə normal münasibət qurmasını istəmir və bu iqtidarın Qarabağı işğaldan azad etməsinə xeyli məyus olub. Az qalsın Rusiya ilə müharibə aparmadığımıza görə bizi qınayır. Arasıra da bəndənizi hədəf alıb guya Rusiyaya satıldığımı iddia edir. 

İndiyədək eşitdiyim böhtanlardan ən maraqlısı olduğuna görə burada qeyd edirəm. Bu zavallı danabaş hələ də otuz il öncəki ağlı ilə düşünür ki, biz çeçenlər kimi böyük əksəriyyətimiz məhv olmaq bahasına da olsa Rusiya ilə savaşaraq bölgədə güc sahibi olmalıyıq. İçinə sindirə bilmir ki, necə olub ki, bu Rusiyaya satılmış dediyi iqtidar bu gün Türkiyə ilə ən yüksək qardaşlıq münasibəti qura bilmiş və Qarabağın azad olunmasında bu faktor əsas rol oynamışdır. Mən də Türkiyə ilə birlikdəliyin həmişə ən qatı tərəfdarı olan və bunu hər fürsətdə təbliğ edən şəxs kimi əl altından həm də Rusiyaya işləyirəmmiş. 

Zavallı danabaş Turqut Ər! Sənin kimilərin səfeh ssenariləri ilə bu dövlətin yürüməsi heç vaxt olmayacaq! Türkiyə ilə qardaşlığımız, birlikdəliyimiz ən üst səviyyədə qalacaq, Rusiya ilə də, İranla da, Avropa Birliyi ilə də normal münasibətlər quraraq ərazi bütövlüyümüzü və suverenliyimizi tam şəkildə bərpa edəcəyik. Ermənistanı da sülhə gəlməyə məcbur edəcəyik. 

Biz bu Vətəni böyük Mehmet Akifin söylədiyi kimi dünyaları versələr də kimsəyə satmayacaq qədər şərəfli insanlarıq. Bəlkə siz də Türkiyəni səmimi olaraq sevirsiniz, ancaq ideologiyanın zəhərlədiyi qafanızdan gələn sərsəm görüşlərlə yalnız Azərbaycana deyil, həmişə Azərbaycanla birlikdə olan Türkiyəyə də ziyan verirsiniz. Böyük qələbəmizdən sonra ağıllanacağına inanmadığımız ermənilər bir az ağıllandı, fəqət Turqut Ər kimi dar qafalılar hələ də ötən əsrin 90-cı illərinin xəritələrinə baxıb Türkiyə və Azərbaycan üçün yol xəritəsi cızırlar.

Fazil Mustafa

Həmçinin oxuyun

“Bakıdan yazılı cavab gözləyirik“ – Armen Qriqoryan

“Ermənistan Azərbaycana sərhədlərin delimitasiyası prosesinə başlamaq üçün yazılı təkliflər göndərib, lakin hələlik cavab almayıb”. Yenisabah.az …