Ana səhifə / Siyasət / Dövlət orqanlarında vəzifə tutan deputatlar yenə namizəd olacaqlar?

Dövlət orqanlarında vəzifə tutan deputatlar yenə namizəd olacaqlar?

Azərbaycan Respublikası Konstitusiyasının 89-cu maddəsinə görə, Milli Məclisin deputatı dövlət orqanlarında vəzifə tutduqda, din xadimi olduqda, sahibkarlıq, kommersiya və başqa ödənişli fəaliyyətlə məşğul olduqda (elmi, pedaqoji və yaradıcılıq fəaliyyəti istisna olmaqla) mandatdan məhrum edilir.

Ancaq beşinci çağırış Milli Məclisin üzvləri arasında həm deputat statusuna, həm də ödənişli vəzifəyə sahib olan şəxslər var.

 “Konstitutsiya Araşdırmaları” Fondunun prezidenti, hüquqşünas Əliməmməd Nuriyev mövzu ilə bağlı Modern.az-a danışıb. O bildirib ki, Azərbaycan Respublikasının Konstitusiyası Milli Məclisin deputatlarına bəzi vəzifələri tutmağı qadağan edir:


“Deputatlar sahibkarlıq fəaliyyətilə məşğul ola bilməzlər. Həmçinin, deputatın icra qurumlarında, məhkəmə orqanlarında çalışması da qanunla qadağandır. Milli Məclis qanunverici hakimiyyətin bir qoludur. Yalnız Milli Məclisin deputatının fəaliyyəti qanunvericiliklə əhatə olunmalıdır. Bu və ya digər komissiyaların üzvü ola bilər. Sadəcə, bu, ödənişli vəzifə olmamalıdır.  Milli Məclisin deputatı hər hansı ödənişli vəzifə tuta bilməz. Deputatın əmək haqqı  Milli Məclisdən aldığı məvaciblə məhdudlaşmalıdır”.


Hüquqşünasın sözlərinə görə, namizədliyini irəli sürən şəxs bu barədə məlumatlı olur:


“Hər kəs deputatlığa namizədliyini irəli sürəndə digər ödənişli vəzifəni tutmaması ilə bağlı öhdəlik götürür. Bu Seçki Məcəlləsində təsbit olunmuş haldır. “Əgər mən deputat seçiləcəmsə, həmin vəzifədən imtina edəcəm” deməkdir. Hakimiyyətin bölgüsünə görə, icra hakimiyyətində, məhkəmədə çalışan şəxs Milli Məclisdə çalışa bilməz. Dünyada da belə yanaşma mövcuddur ki, hakimiyyətin bölgüsü varsa, burada hər şey aydın olmalıdır. Hər kəsin hansı hakimiyyətdə təmsil olunması  ilə məhdudlaşmalıdır”.


Əliməmməd Nuriyev Milli Məclisdə zaman-zaman ödənişli vəzifə tutan şəxslərin deputat kimi fəaliyyətini də istisna etməyib:


“Azərbaycan Milli Məclisində müxtəlif zamanlarda müxtəlif qurumlarda çalışan şəxslər olub. Hesab edirəm ki, bununla bağlı Konstitusiya Məhkəməsinin aydın bir şərhi olmalıdır. Bir çox şeylər aydındır. Düşünürəm ki, Konstitusiya Məhkəməsi bununla bağlı da şərh verməlidir. Bu zaman həmin məsələlərə də son qoyular. Vəzifədə olan şəxs  deputatlıq fəaliyyətindən imtina etməlidir. Təəssüf ki, bizdə “Maraqların toqquşması haqqında” qanun qəbul edilməyib. Qanunvericiliyin indiki tələblərinə görə, Milli Məclisdə vəzifə tutan deputat mandatdan imtina etməlidir. Vəzifəli şəxsin deputat kimi fəaliyyət göstərməsi yolverilməzdir. Bu, artıq maraqların toqquşması deməkdir. Hakimiyyət budaqlarının qarışması, hakimiyyət bölgüsü prinsipinin pozulmasıdır”.

Həmçinin oxuyun

“İlham Əliyevin üçüncü gücün müdaxiləsi barədə dedikləri İrana yaxşı bir mesajdır…”

Müharibənin müəyyən mərhələsində diplomatik meydanda aktiv fəaliyyətin olacağı gözlənilən idi və istər Avropa ölkələri və …