Ana səhifə / Siyasət / Deputatdan Mübariz Qurbanlının işdən çıxarılmasına reaksiya: “Təsadüfi adamlar…”

Deputatdan Mübariz Qurbanlının işdən çıxarılmasına reaksiya: “Təsadüfi adamlar…”

Azərbaycan hökumətinin tərkibində dəyişiklik olub. Prezident İlham Əliyev bu gün imzaladığı sərəncamla Nazirlər Kabinetinin yeni tərkibini formalaşdırıb. Hökumətin 2 qocaman üzvünə – 70 yaşlı Mübariz Qurbanlı və 69 yaşlı Fikrət Məmmədova etimad göstərilməyib. 

Milli Məclisin İctimai birliklər və dini qurumlar komitəsinin üzvü deputat Ceyhun Məmmədov Yenisabah.az-a Mübariz Qurbanlı ilə bağlı qərarı şərh edib. Deputat dini sahədə ciddi islahatlara ehtiyac olduğunu deyib: 

“Hesab edirəm ki, din sahəsində ölkəmizdə və dünyada baş verən proseslər çox ciddi islahatların keçirilməsini zəruri edir. Əslində, bu gün Azərbaycan üçün ən ciddi təhlükə yarada biləcək məsələlərdən biri din mövzusudur. Söhbət dinin siyasiləşməsindən, geosiyasi proseslərə təsirindən gedir. Bu mənada dövlətin bu sahədə müəyyən addımlar atması, islahatların keçirilməsi gözlənilən idi. Bu mövzuda həllini gözləyən hələ xeyli məsələ var. Bu baxımdan dövlət bütün bu prosesləri görür və təhlil edir. Bu həm də dövlətin bu sahəyə çox həssas və diqqətlə yanaşdığını göstərir. Qeyd etdiyim kimi, bu vəzifədə kimin olmasından asılı olmayaraq, din sahəsində sürətli islahatların aparılmasına ciddi ehtiyac var. Əvvəla bu vəzifəyə təyin olunacaq şəxsin həm dini, həm də siyasi biliklərinin yüksək olması çox önəmlidir. Yəni həm dini sahəni, həm də dövlətin bu məsələdə həyata keçirdiyi siyasəti dərindən bilməlidir”. 

Ceyhun Məmmədov Dini Qurumlarla İş üzrə Dövlət Komitəsinin öncəki fəaliyyətini tənqid edib: 

“Bütövlükdə din siyasəti, din sahəsi komitəyə həvalə olunub. Ona görə də bu vəzifəyə təyin olunan şəxsin dini dərindən bilməsi çox önəmlidir. Digər tərəfdən düşünürəm ki, sürətli formada lazımi islahatları həyata keçirəcək bir şəxs olmalıdır ki, qarşımıza qoyduğumuz məqsədlərə nail ola bilək. Mən əvvəlki müsahibələrimdə bu məsələyə geniş toxunmuşam. Dini Qurumlarla İş üzrə Dövlət Komitəsinin fəaliyyətindən narazılığımı dəfələrlə bildirmişəm. Hesab edirəm ki, komitə fəaliyyətini cənab prezidentin apardığı siyasətə uyğun qurmayıb. Bu gün komitənin fəaliyyətində çox ciddi problemlər var və bu problemlər aradan qaldırılmalıdır. Həm islahatlar, həm də dövlət-din münasibətləri ilə bağlı xeyli məsələlər var ki, öz həllini tapmalıdır. Komitə ümumiyyətlə fəaliyyətini yenidən qurmalı və daxildə çox ciddi kadr islahatları aparılmalıdır. Təsadüfi adamlar bu qurumdan tamamilə kənarlaşdırılmalıdır”.

Həmçinin oxuyun

Azərbaycanın AŞPA-ya qaytarılması müzakirə olunur

Azərbaycanın Avropa Şurası Parlament Assambleyasına (AŞPA) qayıtması üçün Nazirlər Komitəsində danışıqların getdiyi bildirilir. Avropa Şurası Nazirlər …