“Bura forumun işində ən fəal iştirak edən personalar seçilir”
Vüqar Qədirov: “Cənab Prezident klubun üzvüdürsə, demək, xüsusi fəallığı ilə oradakıların diqqətini cəlb edib”
Dünya İqtisadi Forumunun icraçı sədri Klaus Şvabın adından Dünya İqtisadi Forumunda on dəfədən artıq iştirak edən rəhbər şəxslər üçün qəbul təşkil olunub. Azərbaycan Respublikasının Prezidenti İlham Əliyev qəbulda iştirak edənlər sırasında olub.
İlham Əliyev tədbir çərçivəsində Dünya İqtisadi Forumunun icraçı sədri Klaus Şvab ilə görüşüb.
Xatırladaq ki, ötən il Dünya İqtisadi Forumunun icraçı sədri Klaus Şvab Dünya İqtisadi Forumunda onuncu dəfə iştirak etdiyinə görə Davos fəxri üzvlər klubunun nişanını Prezident İlham Əliyevə təqdim etmişdi.
Prezidentin üzv seçildiyi Davos fəxri üzvlər klubu nə deməkdir?
Ekspert Vüqar Qədirov “Bakı-Xeber”ə açıqlamasında bildirdi ki, ölkə başçısı Davos Forumunun işində mütəmadi iştirak edir:
“Bunun üçün Davos Forumunun tarixini bilmək lazımdır. Onda məlum olar ki, ölkə başçısana fəxri üzvlük titulunu təqdim edən şəxs elə Forumun əsas yaradıcısıdır.
Ümumdünya İqtisadi Forumu 1971-ci ildə İsveçrədə biznesmen, professor Klaus M.Şvab tərəfindən təsis olunan, dövlət və hökumət başçılarının, yüksək vəzifəli biznesmenlərin, elm və din xadimlərinin iştirakı ilə keçirilən geniş tərkibli illik iclaslardır. Forum əksər hallarda İsveçrənin Davos şəhərində təşkil olunduğu üçün həmçinin Davos Forumu adlandırılır.
Ümumdünya İqtisadi Forumu qlobal və regional səviyyədə dünyanın başlıca siyasi, sosial və iqtisadi problemlərinin müzakirəsinin aparılması üçün ideal ortam hesab olunur. Bunun əsas səbəbi iqtisadi və siyasi sahədə fəaliyyət göstərən nüfuzlu beynəlxalq və regional səviyyəli təşkilatların rəhbərləri, yüksək vəzifəli bürokratlar və s. ilə interaktiv dialoqların və qeyri-rəsmi danışıqlar üçün əlverişli mühitin təşkil olunmasıdır. Forum çoxsaylı mövzular üzrə sessiyalardan ibarət olur və bu sessiyaların əksəriyyəti geniş miqyasda izlənilməsi üçün İsveçrənin yerli kanallarında canlı olaraq nümayiş etdirilir. Ümumdünya İqtisadi Forumunun hazırda Çinin Tayvan əyalətində və Nyu-Yorkda nümayəndəlikləri mövcuddur. Öz fəaliyyətində bitərəflik prinsiplərinə dayanan forumun fəaliyyəti gəlir və ya mənfəət qazanmaq məqsədi güdmür. 2005-ci ilin yanvarında Ümumdünya İqtisadi Forumu çərçivəsində Gənc Qlobal Rəhbərlər adlı müstəqil təşkilat da təsis olunub. Sözügedən təşkilatın üzvləri yaşı 40-dan az olan və iqtisadi, elmi və siyasi aləmdə, o cümlədən kommunikasiya sahəsində dünyanın aparıcı mütəxəssisləridir.
Ümumdünya İqtisadi Forumu illik dünya forumları ilə yanaşı, Latın Amerikası, Orta Şərq, Afrika, Şərqi Asiya, Rusiya, Avropa və Mərkəzi Asiya üzrə regional iqtisadi forumlar da təşkil edir. Hər il müxtəlif adlar altında təşkil olunan dünya forumları adətən hər ilin yanvar ayında keçirilir.
Beləliklə, qeyd edək ki, 1971-ci ildən keçirilən Davos Ümumdünya İqtisadi Forumu eyni zamanda müxtəlif nominasiyalar da təşkil edir. Onlardan biri də fəxri üzlər klubudur. Bura forumun işində ən fəal iştirak edən personalar seçilir. Cənab Prezident klubun üzvüdürsə, demək, xüsusi fəallığı ilə oradakıların diqqətini cəlb edib”.
Məhəmmədəli QƏRİBLİ