ABŞ Fətullah Gülənin Türkiyəyə təslimi ilə bağlı təklif edib

Bu baradə Vaşhinqtonda təşkil olunmuş mətbuat konfransında çıxış edən ABŞ Dövlət Departamentinin sözçüsü Con Kirbi bildirib.

Cənab Gülənin ekstradisiyası ilə bağlı Türkiyənin göndərdiyi sənədləri yoxladıqlarını deyən cənab Kirbi, rəsmi ekstradisiyanın baş tutması üçün sağlam dəlillərə ehtiyac olduğunu bildirib.

Cənab Kirbi bildirib ki, Fətullah Gülənin təslim edilib-edilməməsi ilə bağlı qərar ABŞ Dövlət Departamenti və Ədliyyə Nazirliyinin birgə fəaliyyətinin nəticəsində veriləcək.

Türkiyə hökuməti ölkədə baş vermiş çevrilişə cəhdin arxasında ABŞ-da mühacirətdə olan din xadiminin dayandığını iddia edir.

Cənab Gülən iddiaları rədd edir.

Rəcəb Tayyip Ərdoğan çevrilişə cəhd zamanı xüsusi xidmət orqanlarında ciddi çatışmamazlıqların olduğunu bildirib

Türkiyə prezidenti Ərdoğan Reuters agentliyinə müsahibəsində bildirib ki, “yeni çevriliş cəhdi mümkündür, ancaq rahat olmayacaq”.

“Bu dəfə daha sayığıq”, -Türkiyə prezidenti əlavə edib.

Cənab Ərdoğan fövqəladə vəziyyətin ehtiyac olacağı təqdirdə daha üç ay uzadıla biləcəyini açıqlayıb.

Türkiyə prezidenti çevrilişə cəhd zamanı xüsusi xidmət orqanlarında ciddi çatışmazlıqların olduğunu və silahlı qüvvələrin sürətlə yenidən formalaşdırılacağını deyib.

“12 saat ərzində hər şey nəzarət altına alındı. Millətimizin meydanlara çıxması hər şeydən önəmlidir. Çətin olsa da, baş nazirlə əlaqə qura bildim. Vətəndaşlarımı küçələrə dəvət etdim”, – o bildirib.

Cənab Ərdoğan deyib ki, “üç ay davam edəcək fövqəladə vəziyyət ərzində gecə-gündüz çalışacağıq. Bu günləri yenidən yaşamaq istəmirik” (“Amerikanın səsi”).