“Ənvər Seyidov Şuşa və Laçının işğalıyla bağlı məhkəməni bazara, şouya döndərmişdi…”

“Bu fikirlərimi məhkəmə proseslərində də, mətbuatda da demişəm.  Şuşa və Laçın rayonlarının  işğalıyla bağlı məhkəmə prosesinə sədrlik edən hakim Ənvər Seyidov  həmin prosesi  bazara, şouya döndərmişdi…”.

Bu sözləri Şuşa və Laçın rayonlarının  işğalı ilə bağlı 1994-1995-ci illərdə aparılmış məhkəmə prosesi haqda  Moderator.az-a açıqlama verən sabiq Müdafiə və Daxili İşlər naziri, Şuşanın işğalından sonra Turşsu qəsəbəsində və Laçında baş vermiş bir sıra olayların şahidi olmuş polis generalı Tahir Əliyev söyləyib. 

“Ənvər Seyidov şahidləri öyrədirdi, vəkillərə, prokurora təzyiq edirdi. Bir sözlə, məhkəmə prosesini istədiyi istiqamətdə yönləndirilirdi. Mən  həmin məhkəmə iclaslarında  şahid kimi iştirak edərək Şuşanın da, Laçının da işğalıyla bağlı gördüyüm, bildiyim faktları söyləmişəm. Amma dediyim kimi, orada oyun gedirdi və mənim digər  gerçək şahidlərin söylədiklərinin əhəmiyyəti olmurdu. Özləri bildikləri kimi nəticələr, qərar və qətnamələr çıxarırdılar… 
İkincisi də, ötən söhbətimizdə dediyim kimi, mən Şuşa və Laçın rayonunun işğalında heç bir hüquqi məsuliyyət daşımırdım, mən cəbhə zonasına könüllü getmişdim. O vaxt Prezident səlahiyyətlərini icra edən Yaqub Məmmədov məni hələ aprelin 25-də Daxili İşlər naziri vəzifəsindən azad etmişdi. Bununla belə,  yüksək vəzifələrdə olduğum, o dövrdə də Gömrük Komitəsinin sədri işlədiyim üçün  məhkəmədə guya məni dolaşdırıb, nədəsə ittiham edərək nəsə “qoparmağa” çalışanlar vardı. Təbii ki, buna nail ola bilmədilər…
Onu da  deyim ki,  Ənvər Seyidov yuxarıların gözünə girmək üçün Şuşa və Laçının işğalında “OMON” döyüşçülərini də günahlandırmağa çalışırdı. Bu günlər guya “OMON”un Şuşanın azad edilməsi üçün heç nə etməməsi haqdakı söz-söhbətlər də məhz buradan qaynaqlanır…” – deyə sabiq nazir bildirib.