Mənzil bazarından fərqli olaraq, yay mövsümündə Bakı və Abşeron yarımadasının torpaq bazarında daha kəskin differensiasiya müşahidə olunur. Dənizkənarı və prestijli bağ sahələrinə tələbatın pik həddə çatdığı bir vaxtda, mövsümi amillər, infrastruktur çatışmazlıqları və sənədləşmə mürəkkəblikləri səbəbindən bəzi ərazilərdə torpaq sahələrinin qiymətində ucuzlaşma və kəskin endirimlər qeydə alınır.
“Yeni Sabah”ın araşdırmasına əsasən, yay aylarında qiymətlərin ən çox eniş göstərdiyi ərazilər sırasına ilk növbədə Abşeron rayonunun dənizdən uzaq və mərkəzi yollardan kənarda yerləşən qəsəbələri — Qobu, Hökməli, Atyalı, Ceyranbatan və Güzdək ətrafı daxildir. Bu ərazilərdə mərkəzləşdirilmiş su və kanalizasiya xətlərinin zəifliyi, eləcə də nəqliyyat tıxacları alıcı marağını azaldır. Əgər yaz aylarında Qobu və Hökməlidə 1 sot torpağın orta qiyməti 1 500 – 2 500 AZN arasında dəyişirdisə, yay dövründə tələbatın düşməsi ilə bu rəqəm 1 300 – 2 100 AZN-ə qədər geriləyib (təxminən 10–15% ucuzlaşma). Ceyranbatan və Güzdək ərazisində isə əvvəllər 3 000 – 4 000 AZN-ə təklif olunan 1 sot torpaq sahələrini hazırda real alıcılar üçün 2 600 – 3 400 AZN aralığında tapmaq mümkündür.
Oxşar tendensiya Paytaxtın Sabunçu və Suraxanı rayonlarının mərkəzdən uzaq yaşayış massivlərində də özünü göstərir. Maştağa, Savalan, Zabrat, Ramana və Bülbülə qəsəbələrinin kənar hissələrində daxili alıcı aktivliyi zəifləyib. Çünki bağ evi tikmək istəyən imkanlı alıcılar bu mövsümdə diqqəti 1 sotunun qiyməti 15 000 – 35 000 AZN arasında dəyişən Mərdəkan, Şüvəlan və Bilgəh kimi dənizkənarı zonalara yönəldirlər. Nəticədə, Maştağa və Ramananın kənar massivlərində yazda 2 500 – 3 500 AZN olan 1 sot torpaq yayda 2 100 – 3 000 AZN-ə, Savalan və Zabratın daxili hissələrində isə 4 500 – 6 000 AZN-dən 4 000 – 5 200 AZN-ə qədər ucuzlaşıb.
Qiymətlərin kəskin enməsində rolu olan ən mühüm amillərdən biri də sənədləşmə məsələsidir. Bələdiyyə sənədli və ya kənd təsərrüfatı təyinatlı torpaqlara dövlət nəzarətinin sərtləşməsi bu kateqoriyadan olan sahələrin bazar dəyərini sürətlə aşağı salır. Xüsusilə Məhmədli, Digah və Fatmayı kəndlərinin çıxarışsız (kupçasız) daxili massivlərində sot qiymətlərində 15–20%-ə çatan ucuzlaşma müşahidə edilir. Məsələn, Məhmədli və Digahda kənd təsərrüfatı təyinatlı torpaqların sotu əvvəlki 2 000 – 3 000 AZN aralığından 1 600 – 2 300 AZN-ə düşüb. Fatmayının dənizdən uzaq hissələrində isə bələdiyyə sənədli torpaqlar 3 500 – 5 000 AZN-dən 2 800 – 4 100 AZN-ə qədər geriləyib.
Ticarət və sənaye obyektləri üçün nəzərdə tutulan, Lökbatan və Şıxov istiqamətindəki kənar ərazilərdə də yayda tikinti aktivliyinin müvəqqəti səngiməsi səbəbindən irihəcmli torpaq sahələrində yumşalmalar baş verir. Lökbatanda sənaye təyinatlı torpaqların sotu 6 000 – 8 000 AZN-dən 5 200 – 7 000 AZN-ə qədər enib. Ümumilikdə, Bakı və Abşeronda yay mövsümündə dənizkənarı bağ zonalarında qiymətlər kəskin artdığı halda, kommunikasiyasız, sənədləşməsi mürəkkəb olan və dənizdən uzaq daxili qəsəbələrdə torpaq qiymətləri orta hesabla 8–18% arasında ucuzlaşır.