Qulu Məhərrəmli: “Heç kimi məcbur etmək olmaz ki, televiziyaya baxsın”
Sosial şəbəkələrdə REAL TV-nin rəhbəri Mirşahin Ağayevin televiziya ilə bağlı səsləndirdiyi fikirlər müzakirə olunur. Jurnalistin televizora baxmamağı “tərbiyəsizlik” adlandırması qınaq yaradıb. İnsanlar günahı televiziyaların fəaliyyətinin düzgün qurulmamasında görürlər.
Mövzu ilə bağlı Pravda.az-a açıqlama verən media eksperti, professor Qulu Məhərrəmlinin sözlərinə görə, televiziya sahəsi üçün çətin günlərdir və təkcə Azərbaycanda belə deyil, dünyada da bu tendensiya gedir.
O qeyd edib ki, buna baxmayaraq dünyada izlənilən maraqlı televiziyalar var: “Transmilli televiziyalar, “CNN”, “Euronews”, “BBC” və digər kanallara baxılır. Avropa Birliyinə daxil olan ölkələrin əhalisinin 70 faizinin əsas məlumat mənbəyi televiziyadır. Onlar sosial şəbəkəyə çox bağlı deyillər. Niyə? Çünki televiziya onların istədiyini, ən mühüm məlumatları verir, ictimai müzakirə proqramları hazırlayır. Azərbaycanda isə sosial şəbəkələr o qədər aktiv, hüdudsuz, qaydasız döyüş aparır ki, tamaşaçıların böyük qismini, auditoriyanı özünə cəlb edir. Amma “televiziya ölür, sıradan çıxır” fikri də çox şərti və subyektivdir. Çünki məqamında bu televiziyalar mötəbərlik baxımından sosial şəbəkələri çox geridə qoyur”.
Q. Məhərrəmli vurğulayıb ki, televiziya tamaşaçı auditoriyasının maraqlarını, tələbatını və xəbər ehtiyacını ödədiyi, həmçinin cəmiyyətdə baş verən problemlərin müzakirəsinə həsr olunan verilişlər təqdim etdiyi halda izlənilir: “Ona görə siz televiziya rəhbərisiniz, aparıcısınız və ya redaktorusunuz istəyirsəniz ki, hazırladığınız verilişə də auditoriya baxsın. Nə üçün? Çünki orada böyük insan əməyi, intellekt var, texnika sərf olunur və baxılması arzuolunandır. Heç kimi məcbur etmək olmaz ki, televiziyaya baxsın. Fəal vətəndaş, ölkəsinin problemləri ilə yaşayan, onu izləyən tamaşaçılar xəbərlərə, ictimai diskussiya proqramlarına da baxırlar. Adamlar var ki, televiziyalar müxtəlif formatda verilişlər versə də, biganədir, baxmırlar. O adamları da biz qınamalı deyilik. Bu ümumiyyətlə zövq, maraq, tələbat məsələsidir. Vəziyyət kifayət qədər aydın, bir o qədər də mürəkkəbdir”.